Paris Saint-Germain bëri dy lëvizje më 15 gusht, duke zyrtarizuar mbërritjet e Ferran Torres dhe Mika Godts.
Spanjolli 26-vjeçar, fitues i finales së fundit të Kupës së Botës, mbërrin nga Barcelona për rreth 50 milionë euro.
21-vjeçari belg u ble nga Ajax, ku spikati sezonin e kaluar me 17 gola dhe 12 asiste, për rreth 55 milionë euro: ai gjithashtu ka një kontratë deri në vitin 2031.
Më parë, Maghnes Akliouche mbërriti nga Monaco për 50 milionë euro dhe Lucas Digne nga Aston Villa për 7 milionë euro. Çuditërisht, nënshkrimi i Zion Suzuki dështoi: pavarësisht arritjes së një marrëveshjeje me Parma-n me vlerë 35 milionë euro, PSG përfundimisht u tërhoq.
Sipas “RMC Sport”, klubi francez thuhet se është i mërzitur nga komisionet gjithnjë e më të larta të kërkuara nga menaxherët e portierit japonez.
Për momentin, PSG ka mbetur me Safonov dhe Chevalier në portë, ndërsa Suzuki mund të përfundojë tek Aston Villa, duke hapur potencialisht rrugën për largimin e Dibu Martinez.
Luis Enrique foli drejtpërdrejt për merkaton parisiene në prag finales së Superkupës së Francës kundër Lens:
“Nëse synojmë të përmirësohemi, kjo nuk do të thotë që nuk kemi besim te skuadra. Për të vazhduar të fitojmë, duhet të marrim vendime të vështira, të jemi ambiciozë dhe të besojmë se ardhja e lojtarëve të rinj sjell një energji dhe mentalitet të ndryshëm”, tha trajneri i kampionëve europianë, i cili më pas sqaroi karakteristikat që duhet të kenë nënshkrimet e reja:
“Ne gjithmonë kërkojmë lojtarë që i përshtaten asaj që duam. Nuk ka të bëjë vetëm me goditjen e topit dhe të qenit fizikisht i fortë. Shumë lojtarë duan të vijnë te PSG. Ka lojtarë me cilësi të lartë, por ata nuk kanë nivelin që na duhet për të luajtur ashtu siç duam”.
Përtej aspektit teknik, sipas Luis Enriques, “është e rëndësishme të gjesh lojtarë që e duan të luajnë për PSG-në dhe që e vlerësojnë stilin tonë. Nëse një lojtar nuk mbërrin këtu me një buzëqeshje, është më mirë të kesh mundësi të tjera.
“Sa herë që mbërrin një lojtar, jam i lumtur sepse do të thotë se është bërë një përpjekje. Po përpiqemi ta përmirësojmë ekipin”, përfundoi ai.
