Gazetari argjentinas Sergio Levinsky, autor i biografisë së botuar së fundmi “Bota e Messit”, ka zbuluar arsyen pse “Pleshti” ka mbërritur në formë të jashtëzakonshme në Kupën e Botës. Deklarata vjen pas paraqitjes spektakolare të ish-yllit të Barcelonës, i cili realizoi një tripletë në fitoren 3-0 të Argjentinës ndaj Algjerisë në ndeshjen hapëse të turneut.
“Ka një sekret pas kësaj gjendjeje fizike. Messi është përgatitur në fshehtësi të plotë. A i keni parë 4 ndeshjet e fundit të Inter Miami? Ai, fjalë për fjalë, fluturonte në fushë. Edhe Rodrigo De Paul mbeti i mahnitur. Hyri në miqësoren kundër Islandës dhe e ndryshoi tërësisht rrjedhën e lojës. Objektivi i tij i vetëm ishte Kupa e Botës”, – u shpreh Levinsky në një intervistë për një kanal televiziv kinez, cituar nga “Gazzetta dello Sport”.
Gazetari e krahasoi këtë situatë me mënyrën se si Carlos Bilardo e përgatiti Diego Maradonën para Botërorit të vitit 1986: “Kjo tingëllon si historia e Bilardos me Maradonën para vitit 1986”.
Autori i biografisë së Messit shtoi: “Messi mund të bëjë edhe më shumë. Diego luante te Napoli dhe kishte një hapësirë veprimi të kufizuar. Ndërsa Messi ka disa klauzola në kontratën me Inter Miami, që i japin liri të plotë. Ai mund të konsultohet me mjekun e kombëtares argjentinase, madje të udhëtojë në Argjentinë në rast të ndonjë problemi fizik. Messi është ai që merr vendimet, është lideri i vërtetë. Ai kërkoi që Rodrigo De Paul të ishte pjesë e projektit dhe zgjodhi trajnerin Hoyos, të cilin e njihte që nga ekipet e moshave te Barcelona”.
Përgatitja e fshehtë dhe kujdesi maksimal për gjendjen e tij fizike duket se kanë dhënë rezultatet e dëshiruara, me Messin që e ka nisur Kupën e Botës në mënyrën më spektakolare të mundshme, duke konfirmuar edhe një herë statusin e tij si një nga futbollistët më të mëdhenj në histori.
The post Zbulohet sekreti i Messit: “Është përgatitur në fshehtësi të plotë, e patë si fluturonte” appeared first on Telesport.
