Shtetet anëtare të BE-së kanë dërguar tre helikopterë dhe dy avionë kanardë për të ndihmuar Belgjikën në luftimin e një zjarri në lindje të vendit, tha shefi i menaxhimit të krizave të Bashkimit Evropian, pasi autoritetet belge kërkuan përforcime urgjente për të vënë nën kontroll zjarrin më të madh që ka goditur vendin në dekada.
Një zjarr i madh ka përfshirë Hautes Fagnes, rezervatin më të madh natyror të Belgjikës, dhe ka qenë duke u djegur atje që nga e premtja. Zjarrfikësit vendas, fermerët dhe ushtria e vendosur atje po përpiqen të parandalojnë përhapjen e zjarrit. Deri pasditen e sotme, rreth 1,600 hektarë janë djegur, raportuan mediat lokale, duke cituar guvernatorin e provincës së Liège.
Ky është zjarri më i madh i regjistruar ndonjëherë në Belgjikë, më i madh se ai i vitit 2011, kur u dogjën pothuajse 1,400 hektarë tokë, sipas të dhënave nga Sistemi Evropian i Informacionit për Zjarret në Pyje.
Vendet evropiane, përfshirë Belgjikën, janë goditur nga vala e pestë e të nxehtit të vitit këtë javë, duke intensifikuar më tej kushtet e nxehta dhe të thata që favorizojnë zjarret. Shkencëtarët kanë konfirmuar se ndryshimet klimatike të shkaktuara nga njeriu po intensifikojnë gjithashtu kushtet e motit “që lejojnë që zjarret të përhapen më shpejt dhe të zgjasin më shumë”.
BE-ja po koordinon vendosjen e burimeve shtesë nga vendet evropiane sapo njëra prej tyre të kërkojë ndihmë urgjente. Avionët e dërguar sot në Belgjikë mbërritën nga Republika Çeke, Suedia dhe Holanda, njoftoi në platformën X Komisionerja e BE-së për Krizat Hadja Lahbib.
Zjarrfikësit dhe fermerët deri më tani kanë përdorur ujë nga liqenet lokale në luftën kundër zjarrit, tha sot për Reuters një zëdhënës i departamentit të infrastrukturës së rajonit belg frëngjishtfolës të Wallonisë. /
