Kuvendi i Kosovës sot ka miratuar nismën ligjore të propozuar nga Lëvizja Vetëvendosje për dënimin në mungesë të kriminelëve që kanë kryer krime në Kosovë gjatë regjimit të Millosheviqit.
“Në vend se Ministri i Drejtësisë, të dilte në mbështetje të saj, edhe sot hasëm në kundërshtime të pajustifikuara nga ai dhe nga Qeveria. Kjo edhe e vonoi për shumë muaj miratimin e kësaj nisme të domosdoshme. Por sot në Kuvend pas shumë përpjekjeve u miratua”, është thënë në komunikatën e kësaj partie.
Sipas Lëvizjes Vetëvendosje, pasi që kjo të nënshkruhet e botohet në Gazetën Zyrtare, prokuroria speciale dhe i gjithë sistemi në Kosovë nuk ka asnjë pengesë apo dhe alibi për të mos vijuar me këto raste.
“Pra me hyrjen më fuqi të këtij ndryshimi lejohet hetimi, akuzimi dhe gjykimi në mungesë për kriminelët e luftës”, është theksuar në këtë komunikatë.
