Qytetarët e Kolumbisë iu drejtuan sot qendrave të votimit për të zgjedhur presidentin e ri të vendit, në një proces zgjedhor që konsiderohet vendimtar për të ardhmen politike, ekonomike dhe të sigurisë së shtetit latino-amerikan.
Zgjedhjet po zhvillohen në një klimë të tensionuar politike, pas muajsh përplasjesh verbale dhe akuzash publike mes presidentit aktual të majtë, Gustavo Petro, dhe presidentit amerikan Donald Trump, raporton BBC, transmeton Klankosova. tv.
Mosmarrëveshjet mes dy liderëve janë përqendruar kryesisht te lufta kundër trafikut të drogës, siguria rajonale dhe roli i Shteteve të Bashkuara në Amerikën Latine.
Sipas Kushtetutës së Kolumbisë, Petro nuk ka të drejtë të kandidojë për një mandat të dytë radhazi.
Ai ka dhënë mbështetjen e tij për kandidatin Ivan Cepeda, i cili synon të vazhdojë politikat e administratës aktuale.
Përballë tij në garë janë kandidati i krahut të djathtë Abelardo de la Espriella dhe senatorja konservatore Paloma Valencia, të cilët premtojnë një qasje më të ashpër ndaj grupeve kriminale dhe organizatave të trafikut të drogës.
Teksa qendrat e votimit u hapën në orën 08:00, presidenti Petro iu drejtua mbështetësve të tij në kryeqytetin Bogota, duke deklaruar se votimi i së dielës do të “përcaktojë drejtimin e Kolumbisë” dhe “fatin e vendit për vitet e ardhshme”.
Procesi i votimit do të zgjasë deri në orën 16:00 sipas kohës lokale, ndërsa rezultatet paraprake pritet të publikohen menjëherë pas mbylljes së qendrave të votimit.
Sondazhet e fundit tregojnë se Ivan Cepeda gëzon mbështetjen më të madhe mes kandidatëve, ndërsa Abelardo de la Espriella konsiderohet rivali i tij kryesor.
Megjithatë, asnjë kandidat nuk pritet të sigurojë shumicën absolute të votave, çka e bën shumë të mundshëm zhvillimin e një balotazhi më 21 qershor.
Tashmë vëmendja e gjithë vendit është përqendruar te kutitë e votimit, ndërsa rezultati i zgjedhjeve pritet të përcaktojë jo vetëm udhëheqësin e ardhshëm të Kolumbisë, por edhe kursin politik dhe diplomatik të shtetit për vitet që vijnë.
