Cristiano Ronaldo i quan me ironi “lodrat e mia”. Për kampionin portugez, makinat (“lodrat e tij”) nuk janë thjesht automjete dhe kjo shprehje, të cilën e përdor teksa fotografohet ulur mbi kofanon e një Ferrari, tregon shumë për shpirtin e tij si koleksionist i apasionuar, që mund të mburret me një nga garazhet më ekskluzive në botë.
Ylli i Al-Nassr zotëron një flotë prej rreth 40-41 makinash, aq shumë saqë edhe vetë ai nuk arrin ta kujtojë numrin e saktë. Ka humbur llogarinë e automjeteve që janë të parkuara mes pronave të tij në Arabinë Saudite dhe Portugali, përveç atyre që i merr me vete sipas eksperiencave profesionale gjatë karrierës.
Kështu ndodhi edhe gjatë periudhës së tij te Juventusi në Torino. Organizimi logjistik i largimit të tij nga Italia nisi pikërisht me kolonën e kamionëve që transportuan makinat luksoze. Vlera totale e koleksionit vlerësohet rreth 28 milionë euro, por bëhet fjalë për një përllogaritje të përafërt, duke marrë parasysh ritmin me të cilin CR7 pasuron garazhin e tij dhe rritjen e vlerës së hipermakinave, disa prej të cilave prodhohen në seri të kufizuara.
Ronaldo ka humbur numërimin e makinave: “Mund të jenë 40 ose 41”
Gjatë një interviste me Piers Morgan rreth një vit më parë, Ronaldo pranoi se nuk ishte në gjendje të tregonte me saktësi sa makina zotëron dhe ruan në garazhet e tij. “Besoj se janë 40…, ndoshta 41”, – tha ai, duke lënë të habitur bashkëbiseduesin. CR7 ka një pasuri të tillë saqë disa prej pronave të tij është e pamundur t’i numërohen me dorë; një fjali që tregon përmasat e arritura nga koleksioni i makinave.
Nuk ekziston një inventar zyrtar i makinave të Ronaldos. Shumë modele janë identifikuar përmes fotografive, videove të publikuara në rrjetet sociale, daljeve publike apo reportazheve kushtuar garazheve të kampionit portugez.
“Bugatti” janë thesari i vërtetë i garazhit të CR7
Marka “Bugatti” është padyshim pjesa më e çmuar e koleksionit të Ronaldos. Është marka që identifikon më së miri preferencën e veçantë të portugezit për automjetet e këtij prodhuesi. Modeli shumë i rrallë “Bugatti Centodieci” (i prodhuar në vetëm pak ekzemplarë) është xhevahiri i koleksionit. Vlera e tij në treg vlerësohet tashmë nga 8 deri në 9 milionë euro.
Krahas saj ndodhen edhe modele të tjera ikonike të kompanisë franceze “Chiron”, “Veyron Grand Sport Vitesse” dhe “Tourbillon”, makina e fundit luksoze që i është shtuar koleksionit. Vetëm makinat “Bugatti” përbëjnë një pjesë të konsiderueshme të pasurisë së tij automobilistike.
“Ferrari”, “Rolls-Royce” dhe supermakinat e tjera luksoze
Pasioni i Ronaldos, megjithatë, shkon përtej “Bugatti”. Në garazhin e tij nuk mund të mungonin “Ferrari” më ekskluzive të prodhuara ndonjëherë si: “Ferrari Daytona SP3” (edicion i kufizuar, me vlerë rreth 2-2.5 milionë euro); “Ferrari Monza SP1/SP2” (1.4-1.8 milionë euro); “Ferrari Purosangue” (rreth 400 mijë euro); “Ferrari F12 TDF” (e kufizuar në 799 ekzemplarë, rreth 350-450 mijë euro); “Ferrari 599 GTO” (rreth 450-500 mijë euro); përveç modeleve të tjera si “599 GTB Fiorano”, “F430” dhe automjeteve të tjera me vlerë më të ulët.
Lista e Ronaldos përfshin gjithashtu marka simbol të luksit automobilistik si “Rolls-Royce”, “Bentley”, “Lamborghini”, “McLaren”, “Aston Martin”, “Range Rover”, “Maserati”, “Audi”, “Porsche” dhe “Brabus”.
Mes makinave më të veçanta është edhe një “BMW XM Red Label”, e marrë në kuadër të partneritetit mes prodhuesit gjerman dhe Al-Nassr, ndërsa “Brabus G-Class” (fuoristradë gjigante dhe ikonë e luksit ekstrem) është një nga dhuratat më të njohura që ka marrë nga Georgina Rodríguez.
Një koleksion që është edhe formë investimi
Veçantia e garazhit të Cristiano Ronaldos nuk qëndron vetëm te numri i makinave, por mbi të gjitha te rrallësia e tyre. Shumë modele janë prodhuar në vetëm disa dhjetëra ekzemplarë, ndërsa të tjera janë personalizuar plotësisht dhe tashmë kanë fituar një vlerë shumë më të madhe sesa çmimi fillestar.
Për këtë arsye, pasuria automobilistike e portugezit nuk mund të konsiderohet vetëm si një pasion personal apo si luks i një personi jashtëzakonisht të pasur, por edhe si formë investimi e një pasurie të krijuar falë futbollit, trofeve dhe rekordeve që e kanë kthyer Ronaldon në një nga sportistët më të njohur në botë.
al”>Telesport.
