Nesër, të martën e 11 gushtit, publikohet në “Netflix” dokumentari për José Mourinho. Në të zbulohet se portugezi mund të ishte bërë trajner i Manchester United, duke zëvendësuar Sir Alex Ferguson në vitin 2013, menjëherë pas largimit nga Real Madridi. Por, kur gjithçka dukej se Mourinho do të shkonte në “Old Trafford”, ai përfundimisht firmosi me Chelsea.
“Kur u largova nga Real Madridi, firmosa me Manchester United për të zëvendësuar Sir Alex”, – rrëfeu Mourinho në dokumentar. Ferguson e konfirmoi: “Iu ofrua posti, është e vërtetë. Ia shpjegova situatën. Nga ana ime, pata përshtypjen se e pranoi. Dhe më pas, brenda pak orësh, gjithçka ndryshoi”.
Mourinho mori një ofertë për t’u rikthyer te Chelsea, skuadër që e kishte drejtuar nga 2004 deri më 2007, dhe e pranoi, duke refuzuar “Djajtë e Kuq”. “Një natë më telefonoi duke qarë dhe më tha: Alex, nuk mundem më. I dhashë fjalën Chelsea dhe nuk do ta shkel, – zbuloi Ferguson, duke shtuar: – Mund ta kuptoja arsyen e tij, por mbeta i zhgënjyer”.
Mourinho pranoi se humbja e mundësisë për të zëvendësuar Fergusonin ishte dramatike, por tha se nuk pendohet. “Ishte një vendim që e mora me zemër. Besoj se Nietzsche ka thënë se kur dikush bën diçka nga dashuria, nuk gabon kurrë. Ishte diçka që e bëra nga dashuria”, – shtoi ai për rikthimin te Chelsea.
