Kryeministri Avdullah Hoti ka refuzuar kërkesën e ministrit Zemaj për shkarkimin e Bordit të SHSKUK’së.
Ministri i Shëndetësisë Armend Zemaj ka synuar të shkarkojë Bordin Drejtues të Shërbimit Spitalor Klinik Universitar, ka mësuar nga burime Gazeta Shneta.
Këtë kërkesë Zemaj e ka bërë në kohën kur po pritet të zgjidhet drejtori i përgjithshëm i SHSKUK-së, pas vendimit të Bordit për ndërrimin e anëtarëve të Komisionit Vlerësues. Me këtë vendim Bordi e hoqi nga Komisioni këshilltarin e Zemajt, Diellor Rizaj dhe dy anëtarë të tjerë, Vjollca Kodollin dhe Haki Smajlin.
Anëtarë të këtij komisioni janë kryesuesi i Bordit Xhevat Jakupi, anëtarët e Bordit Agreta Gecaj-Gashi dhe Naim Hoxha, sekretari i MSH-së Ardian Mehmetaj dhe Ismet Berisha nga zyra e personelit në SHSKUK.
Por pas refuzimit të kërkesës nga Hoti, Zemaj sot ka ftuar në një takim anëtarët e Bordit. Gazeta ka mësuar nga burime se ky takim është mbajtur me tensione ndërmjet ministrit dhe anëtarëve të Bordit të SHSKUK-së, për shkak të procesit të rekrutimit të kandidatëve për drejtor të SHSKUK-së ku njëri nga ta është ish-këshilltari i Zemajt, Saudin Maliqi.
Për pozitën e drejtorit të përgjithshëm në SHSKUK kanë kandiduar gjashtë persona, por dy prej tyre janë eliminuar nga gara nga Zyra e sektorit për burime njerëzore.
Valbon Krasniqit, i cili aktualisht është ud drejtor i SHSKUK-së, i është refuzuar kandidatura me arsyetimin se nuk i plotëson kriteret e konkursit për përvojë 5 vjeçare në menaxhim, njëjtë sikurse edhe Gloria Stakës.
Ndërkaq në garë kanë mbetur katër kandidatë të tjerë, Saudin Maliqi – ish-këshilltar i Zemajt, Gani Halilaj, ish-kandidat për deputet nga PDK, Basri Lenjani – ish-kandidat për deputet nga AAK dhe Driton Ukmata – ish-këshilltar i Basri Sejdiut.
Sipas informacioneve që ka Gazeta, Komisioni Vlerësues ende nuk i ka marr dokumentet e kandidatëve.
