Premierliga është një nga kampionatet më të pasura me të dhëna statistikore.
Me grumbullimin e vazhdueshëm të informacioneve, aftësia për të parashikuar rezultatin e 380 ndeshjeve me një bazë matematikore bëhet gjithnjë e më e avancuar, duke u dhënë tifozëve një tjetër arsye për debat.
Parashikimet për sezonin 2026-27 janë përpunuar nga “Compare.bet” përmes një kombinimi të inteligjencës artificiale agjentike dhe algoritmeve matematikore të probabilitetit.
Sipas këtyre llogaritjeve, Arsenal pritet të fitojë titullin e Premierligës për të dytin sezon radhazi, diçka që klubi londinez nuk e ka arritur që nga mesi i viteve 1930.
Sipas të dhënave, “Topçinjtë” kanë 45 për qind gjasa për ta mbrojtur titullin kampion.
Manchester City renditet në vendin e dytë, vetëm tre pikë pas kampionëve në fuqi, ndërsa Liverpool parashikohet të përfundojë i treti, 11 pikë pas Cityt. Chelsea renditet në vendin e katërt, katër pikë prapa Liverpoolit.
Aston Villa, që e mbylli sezonin 2025-26 në vendin e katërt, sipas këtij parashikimi zbret në pozitën e pestë dhe do të kishte nevojë që Premierliga të siguronte sërish një vend shtesë për në Ligën e Kampionëve.
Ndoshta befasia më e madhe është Manchester United. Pasi e përfundoi sezonin e kaluar në vendin e tretë, superkompjuteri parashikon që “Djajtë e Kuq” do të bien në vendin e gjashtë.
United ka vetëm 3.5 për qind gjasa për ta fituar titullin, megjithatë vlerësohet se ka më shumë gjasa të kualifikohet në Ligën e Kampionëve sesa të mbetet jashtë saj.
Vetëm Arsenal, Manchester City (38 për qind) dhe Liverpool (11 për qind) kanë probabilitet më të lartë për ta ngritur trofeun në muajin maj.
Madje, plot 12 skuadra kanë zero për qind shanse për të fituar titullin, dhe në disa raste edhe ky vlerësim duket bujar.
Lajmet nuk janë aspak të mira për Hull City, Ipswich Town dhe Coventry City, të cilat parashikohen të jenë tre skuadrat që do të bien nga kategoria.
Shanset për rënie nga elita janë vlerësuar në 54 për qind për Ipswich, 68 për qind për Coventry dhe plot 84 për qind për Hull City.
Sipas parashikimit, Hull do ta mbyllte sezonin me vetëm 19 pikë, duke u renditur mes dhjetë skuadrave më të dobëta në historinë e Premierligës, në të njëjtin nivel me Sunderlandin e sezonit 2002-03 dhe Portsmouthin e sezonit 2009-10, që kishte humbur nëntë pikë për shkak të dënimit.
“Superkompjuteri simuloi sezonin e Premier League 10 mijë herë, duke përcaktuar probabilitetet e çdo ndeshjeje përmes përdorimit të renditjes aktuale Elo të skuadrave, analizës së sentimentit, të dhënave nga tregu i basteve dhe performancave historike”, thuhet në shpjegimin e “Compare.bet”.
“Renditjet Elo të secilës skuadër përditësohen në mënyrë dinamike bazuar në të dhëna si performanca mbi ose nën pritshmëritë e xG. Çdo simulim gjeneron rezultatin e secilës ndeshje dhe, në fund të çdo sezoni të plotë të simuluar, regjistrohen dhe analizohen të dhëna si pozicioni përfundimtar i çdo skuadre në renditje”.
