Rusia ka kundërshtuar të premten idenë e një armëpushimi në Detin e Zi, duke thënë se nuk sheh asnjë arsye për “masa gjysmake” që do t’i jepnin palës tjetër një periudhë lehtësimi.
Rusia dhe Ukraina kanë intensifikuar sulmet ndaj anijeve tregtare në Detin e Zi gjatë javëve të fundit, duke ndikuar edhe në rritjen e çmimeve globale të drithërave.
Zëdhënësja e Ministrisë së Jashtme ruse, Maria Zakharova, akuzoi Ukrainën për “akte të hapura terrorizmi” ndaj transportit detar, ndërsa nuk përmendi sulmet e Rusisë.
“Ne i konsiderojmë këto sulme (nga Ukraina) si një politikë të qëllimshme për destabilizimin e transportit civil në rajonin e Detit të Zi, me synim përshkallëzimin e mëtejshëm të tensioneve dhe zgjatjen e konfliktit”, tha Zakharova, shkruan Reuters, \.
Ajo shtoi se Rusia nuk sheh shenja përmirësimi të situatës dhe, për këtë arsye, nuk ka bazë për masa që vetëm do t’i jepnin Kievit një “frymëmarrje të përkohshme”.
Zakharova tha se komentet e saj vinin pas deklaratave të ministrit të Jashtëm turk, Hakan Fidan, i cili kishte thënë në një intervistë se Ankaraja u kishte paraqitur Rusisë dhe Ukrainës propozime për një moratorium mbi operacionet ushtarake në Detin e Zi.
