Irani i ka bërë thirrje Shteteve të Bashkuara të pranojnë humbjen, ndërsa presidenti amerikan, Donald Trump e cilësoi Teheranin si një vend “shumë të keq” dhe u kërkoi amerikanëve të përgatiten për çmime të larta të karburantit si pasojë e luftës.
Përparimi drejt bisedimeve të paqes dhe trafiku i cisternave të naftës përmes ngushticës strategjike të Hormuzit mbeten të bllokuara. Nuk ka ende shenja se palët ndërluftuese po afrohen drejt përfundimit të konfliktit, i cili nisi më 28 shkurt me sulmet e SHBA-së dhe Izraelit ndaj Iranit.
“Ngushtica e Hormuzit do të hapet dhe mbyllet vetëm me urdhrin e Iranit. Për sa kohë që nuk e pranoni realitetin e humbjes dhe vazhdoni të jetoni në fantazi, Irani do të vazhdojë të zbatojë bllokadën”, deklaroi zëvendësministri i Jashtëm iranian, Kazem Gharibabadi, përmes një postimi në X të shtunën herët.
Çmimi i benzinës në SHBA rritet 29% brenda një viti
Ministri i Jashtëm iranian, Abbas Araqchi, tha se Irani ende nuk ka marrë një vendim për rifillimin e bisedimeve me SHBA-në.
Në një intervistë për median iraniane Shahrara News, të publikuar të shtunën, Araqchi deklaroi se Uashingtoni duhet të plotësojë disa kushte lidhur me ngushticën e Hormuzit përpara se të lejohet rifillimi i transportit detar në këtë rrugë strategjike, përmes së cilës kalonte rreth një e pesta e naftës botërore përpara nisjes së luftës.
Ndërkohë, Trump u kërkoi amerikanëve të pranojnë çmimet disi më të larta të benzinës për sa kohë vazhdon konflikti me Iranin, shkruan Reuters, \.
Në një tubim politik në Garden City, Nju Jork, të premten, presidenti amerikan tha se pagesa e “pak më shumë” për benzinën ia vlen për të parandaluar që një “vend shumë i keq” të ketë armë bërthamore – një nga arsyetimet kryesore të Trumpit për luftën.
Çmimi mesatar i një galoni benzinë në SHBA ishte rreth 4.08 dollarë të premten, një rritje prej 29% krahasuar me një vit më parë, sipas Shoqatës Amerikane të Automobilistëve (AAA).
Trump, republikan, kishte bërë uljen e kostove të energjisë një nga premtimet kryesore të fushatës së tij për rizgjedhje. Ndërkohë, demokratët po përpiqen ta kthejnë ndikimin ekonomik të luftës në një çështje të rëndësishme në zgjedhjet për Kongresin që mbahen në nëntor.
Çmimet e naftës bruto u rritën me rreth 1 dollar për fuçi të premten. Nafta Brent ishte në rrugën drejt një rritjeje javore prej rreth 6%, ndërsa West Texas Intermediate (WTI) rreth 5.4%.
“Ngushtica e Hormuzit nuk mund të pushtohet me një postim në Twitter, nga një aeroplanmbajtëse, me një urdhër apo përmes një fjalimi elektoral”, tha Gharibabadi.
Edhe Irani po përballet me pasojat ekonomike
Pavarësisht qëndrimit sfidues të Teheranit, shenjat e dëmit ekonomik po bëhen gjithnjë e më të dukshme edhe brenda Iranit.
Presidenti iranian Masoud Pezeshkian, në një deklaratë për televizionin shtetëror, fajësoi për inflacionin e lartë bllokadën amerikane ndaj porteve iraniane dhe sanksionet që kanë kufizuar eksportet e naftës së vendit.
