Edhe këtë vit, KFOR-i në Pejë organizoi një takim ndërfetar të përfaqësuesve të bashkësive fetare nga rajoni i Komandës Rajonale Perëndim.
Në kampin “Villaggio Italia” në Pejë u mbajt një takim ndërfetar me temën: “Përmes zgjedhjes së dialogut mund të ndërtojmë të ardhmen.”
Takimin e kryesoi komandanti i Komandës Rajonale Perëndim të KFOR-it, koloneli Federico Mora, transmeton Paparaci.
Sipas njoftimit të KFOR-it, takimi mblodhi përfaqësues të bashkësive fetare myslimane, ortodokse, katolike, hebraike dhe tarikate nga e gjithë zona e përgjegjësisë së Komandës Rajonale Perëndim.
“Iniciativa ofroi një forum të hapur dhe të paanshëm për dialog, duke nxitur mirëkuptimin e ndërsjellë dhe forcimin e besimit ndërmjet pjesëmarrësve”.
Pretendohet se diskutimet u hapën me reflektime të të rinjve mbi paqen, respektin e ndërsjellë dhe bashkëjetesën.
Aktivitete të tilla, thuhet në fund të njoftimit, pasqyrojnë përkushtimin e vazhdueshëm të KFOR-it për t’u angazhuar me të gjithë njerëzit në mbarë Kosovën, për të nxitur besimin dhe mirëkuptimin e ndërsjellë, si dhe për të kontribuar në një mjedis të sigurt dhe të qetë për të gjithë banorët që jetojnë në Kosovë.
Përfaqësuesit e pesë bashkësive fetare në Kosovë u takuan për herë të fundit më 29 maj, në prag të fillimit të fushatës parazgjedhore për zgjedhjet parlamentare që u mbajtën më 7 qershor.
Me atë rast, në prani të ambasadorit britanik në Kosovë, Jonathan Hargreaves, ata nënshkruan një deklaratë të përbashkët me të cilën u bënë thirrje aktorëve politikë dhe qytetarëve që gjatë procesit zgjedhor të respektojnë parimet e dialogut, dinjitetit dhe respektit të ndërsjellë, si dhe të përmbahen nga gjuha e urrejtjes dhe dezinformimi./Paparaci.com
