Rivaliteti mes Cristiano Ronaldos dhe Lionel Messit dukej se i kishte treguar tashmë të gjitha. “Topa të Artë”, Liga të Kampionëve, gola të pamundur, net të paharrueshme dhe debate pa fund. Sidoqoftë, ky Botëror ka gjetur një arsye të fundit për ta zgjatur rivalitetin më të madh në historinë e futbollit modern.
Cristiano dhe Messi, i cili feston sot ditëlindjen, ndajnë tani një rekord që përmbledh më së miri madhështinë e tyre historike: të dy kanë shënuar gola në Kupën e Botës me një diferencë prej 20 vitesh e 11 ditësh mes golit të parë dhe atij të fundit. Të dy e hapën llogarinë e tyre botërore në vitin 2006 dhe e kanë zgjatur deri në vitin 2026, çka dikur dukej si fantashkencë futbollistike.
Ky fakt bëhet edhe më mbresëlënës kur krahasohen me legjenda që dikur dukeshin të paarritshme. Miroslav Klose, Michael Laudrup dhe Ivica Olić kishin më shumë se 12 vite mes golit të parë dhe atij të fundit në Botëror. Cristiano dhe Messi e kanë çuar këtë rekord në 20 vite. Një arritje e jashtëzakonshme.
Dhe më e bukura është se gara vazhdon. Barazimi është i përsosur: 20 vite e 11 ditë për secilin. Që nga ky moment, çdo raund, çdo aktivizim si titullar, çdo penallti dhe çdo top i lirë në zonë mund të anojë peshoren. Kushdo që arrin më larg dhe shënon sërish, do të mbetet i vetëm në majën e një rekordi që duket pothuajse i pamundur për t’u përsëritur.
Cristiano e dha mesazhin e tij pas dygolëshit të realizuar ndaj Uzbekistanit. “Disa mendonin se isha tërhequr tashmë…, por ja ku jam ende”, – deklaroi portugezi, duke iu përgjigjur dyshimeve që e shoqëruan në fillim të turneut. Në moshën 41-vjeçare, ai u bë gjithashtu futbollisti i parë në histori që shënon në 6 Kupa Bote të ndryshme.
Messi, i cili feston 39-vjetorin gjatë grumbullimit me Argjentinën, përgjigjet në një mënyrë tjetër; përmes efikasitetit të qetë. Argjentinasi vazhdon ta ketë golin në këmbë dhe kryeson renditjen historike mes të dyve në Kupën e Botës me 18 gola, kundrejt 10 të Cristiano Ronaldos.
Njëri ushqehet nga sfida, tjetri nga natyrshmëria. Cristiano duket sikur lufton me kohën sa herë që shkel në zonën kundërshtare. Messi, përkundrazi, e mashtron kohën, sikur vitet të mos arrijnë kurrë ta kapin. Dy rrugë të ndryshme drejt të njëjtit destinacion: historisë.
Botërori 2026 mund të jetë “vallëzimi” i tyre i fundit. Mund të jetë edhe momenti i fundit që ndan një fitues nga tjetri. Pas dy dekadash krahasimesh në çdo aspekt të mundshëm, futbolli iu dhuron një betejë të fundit: kush do të realizojë golin më të vonshëm të karrierës së tij në Kupën e Botës.
Argjentina dhe Portugalia mund të përballen ende në Botërorin 2026, duke ushqyer kapitullin e fundit të madh mes Messit dhe Cristiano Ronaldos. Skenari më i afërt do të ishte në çerekfinale, nëse Portugalia e mbyll grupin në vendin e parë dhe të dyja skuadrat kalojnë dy raundet e para me eliminim direkt. Në atë rast, përballja do të luhej më 11 korrik.
Ekziston edhe mundësia e një dueli në gjysmëfinale, nëse Portugalia e Cristiano Ronaldos avancon si një nga skuadrat më të mira të vendeve të treta dhe arrin mes katër më të mirave. Finalja e ëndrrave mbetet skenari që mban në pritje të gjithë botën e futbollit.
Që kjo të ndodhë, Portugalia duhet ta mbyllë grupin në vendin e dytë dhe më pas të kalojë të gjitha fazat deri në ndeshjen vendimtare, ndërsa Argjentina të bëjë të njëjtën gjë në anën e saj të tabelës. Atëherë, më 19 korrik, Messi dhe Cristiano do të përballeshin kokë më kokë në skenën më të madhe të mundshme. Madje ekziston edhe një alternativë më pak e dëshiruar, por po aq historike: një përballje për vendin e tretë më 18 korrik, nëse të dyja kombëtaret eliminohen në gjysmëfinale.
Mayor tiempo entre el primer y el último gol de un jugador en TODA la historia de la Copa del Mundo:
🇵🇹 20 años y 11 días – CRISTIANO RONALDO (17.06.2006 vs Irán → 23.06.2026 vs Uzbekistán)
🇦🇷 20 años y 11 días – LEO MESSI (16.06.2006 vs Serbia → 22.06.2026 vs Austria)
🇩🇪 12… pic.twitter.com/IZa2PCMi7e— MisterChip (Alexis) (@2010MisterChip) June 23, 2026
Renditja historike e golashënuesve në Kupën e Botës
1. Lionel Messi (Argjentinë) – 18 gola
2. Miroslav Klose (Gjermani) – 16 gola
3. Kylian Mbappé (Francë) – 16 gola
4. Ronaldo Nazário (Brazil) – 15 gola
5. Gerd Müller (Gjermani) – 14 gola
6. Just Fontaine (Francë) – 13 gola
7. Pelé (Brazil) – 12 gola
8. Jürgen Klinsmann (Gjermani) – 11 gola
9. Sándor Kocsis (Hungari) – 11 gola
10. Cristiano Ronaldo (Portugali) – 10 gola
11. Grzegorz Lato (Poloni) – 10 gola
12. Thomas Müller (Gjermani) – 10 gola
13. Harry Kane (Angli) – 10 gola
14. Helmut Rahn (Gjermani) – 10 gola
15. Teófilo Cubillas (Peru) – 10 gola
The post Beteja e fundit e madhe; Messi dhe Ronaldo përballen për rekordin që s’e ka arritur askush në histori appeared first on Telesport.
