Projekti i FIFA-s për të hapur kapitalin e një kompanie të re tregtare ndaj investitorëve privatë vazhdon të shkaktojë reagime të forta negative. Pas UEFA-s dhe disa federatave kombëtare, edhe Bashkimi Europian ka shprehur shqetësime të mëdha për nismën e promovuar nga Gianni Infantino.
Komisioneri europian Glenn Micallef kritikoi ashpër drejtimin e marrë nga futbolli botëror: “Nuk është bejsboll. Kupa e Botës mbetet eventi më i madh sportiv në planet, pavarësisht shfrytëzimit nga FIFA të çdo mundësie tregtare, por tani, mjaft”.
Sipas tij, kërkimi i tepruar për të ardhura të reja rrezikon të dëmtojë vlerat që e kanë bërë futbollin sportin më popullor në botë: “Komercializimi i pakontrolluar i futbollit është bërë i dëmshëm. Ai kërcënon elementët që e kanë bërë këtë sport më të dashurin në botë”.
Micallef shtoi se projekti do të analizohet edhe nga këndvështrimi i ligjit të konkurrencës nga Komisioni Europian. Plani i FIFA-s parashikon krijimin e një kompanie të veçantë që do të menaxhojë të drejtat e garave kryesore, përfshirë Botërorin, me hyrjen e investitorëve privatë. Operacioni mund t’i sjellë FIFA-s rreth 4.2 miliardë dollarë nga shitja e 20% të kompanisë së re, e vlerësuar në total 20 miliardë dollarë.
Në fund, Micallef iu bëri thirrje federatave të përfshijnë të gjitha palët para çdo vendimi: “Suksesi tregtar duhet ta forcojë futbollin, jo t’i shkatërrojë identitetin. Mbani duart larg sportit tonë!”
E BUJSHME! Infantino nxjerr në shitje Botërorin, kuota për fondet amerikane të lidhura me Trump
The post BE kundër Infantinos: FIFA shfrytëzon çdo mundësi komerciale, por futbolli nuk është bejsboll appeared first on Telesport.
