Kryetari i ri Partisë Socialdemokrate, Dardan Molliqaj, ka deklaruar se kandidati për kryeministër i Vetëvendosjes, Albin Kurti është takuar që dy herë me presidentin e Kosovës, Hashim Thaçin.
Molliqaj ka deklaruar se Kurti dhe Thaçi deri tani janë takuar që dy herë, njëri takim sipas tij ka qenë jashtë vendit, kurse tjetri takim ka ndodhur në Kosovës.
“Tashmë janë dy takime që janë mbajtur mes presidentit dhe kandidatit për kryeministër, Albin Kurti. Një është mbajtur jashtë vendit dhe një brenda vendit, të dyja janë mbajtur fshehtë nga publiku. Nuk kam asgjë kundër për mbajtjen e takimeve por jam kundër asaj që nuk po i bëjnë publike”, ka deklaruar Molliqaj.
Molliqaj po ashtu ka deklaruar se Albin Kurti ka pranuar kushtet e Shteteve të Bashkaura të Amerikës që Hashim Thaçi të jetë prijës i negociatave me Serbinë dhe të udhëhiqen nga ai, shkruan Gazeta Metro.
“Nëse i shihni deklaratat dhe intervistat e Ambasadorit amerikan në Kosovë, aty shihet se Albin Kurti është pajtuar që neogciatat me Serbinë të udhëhiqen nga presidenti Thaçi, të gjitha kushtet janë pranuar nga Kurti”, tha Molliqaj në Rubikon të KTV’së.
Molliqaj po ashtu ka thënë se Vetëvendosje dhe LDK-ja që po përpiqen të formojnë qeverinë, nuk dallojnë nga koalicioni PAN që është në qeverisje në ikje, në pikën e dialogut me Serbinë.
