Një aksident në trampolinë u shndërrua në një betejë për jetën për Ruben Shears, i cili ishte vetëm 13 vjeç kur pësoi një goditje në tru dhe më pas 19 mini-goditje në tru.
Një javë pas rënies, prindërit e tij, Andy dhe Chantal, e gjetën të shtrirë në dyshemenë e banjës. Ana e majtë e fytyrës i ishte varur, nuk mund të lëvizte krahun dhe këmbën e majtë, ndërsa të folurit i ishte vështirësuar. Ai u dërgua me urgjencë në spital, ku analizat konfirmuan se kishte pësuar një goditje në tru.
Mjekët zbuluan se ai kishte pësuar një çarje në arterien karotide, e cila furnizon trurin me gjak. Kjo kishte shkaktuar një mpiksje gjaku, që besohet se ishte pasojë e goditjes së fortë në qafë gjatë rënies në trampolinë, shkruan Mirror, transmeton Klankosova.tv.
Brenda pak orësh, Ruben pësoi nëntë mini-goditje në tru dhe më pas edhe 10 të tjera, pavarësisht trajtimit me hollues gjaku. Mjekët u detyruan të kryenin një operacion që zgjati katër orë e gjysmë për të hequr mpiksjen.
Ai kaloi pesë javë në spital duke mësuar sërish të lëvizte. Sot, 14-vjeçari është kthyer në shtëpi, por ende përballet me lodhje dhe të folur pak më të ngadaltë.
“Jemi me fat që është gjallë. Mjekët na thanë se një enë e vogël gjaku në tru e mbajti në jetë. E quajtën një mrekulli,” tha babai i tij, Andy.
