Presidenti amerikan Donald Trump deklaroi se ka lënë udhëzime që Shtetet e Bashkuara të përgjigjen me një forcë ushtarake dërrmuese nëse Irani do të arrinte ta vriste atë.
“Kam qenë në listën e tyre prej kohësh. Me këtë kemi të bëjmë,” i tha Trump gazetës The New York Post të premten, shkruan CNN.
“E vetmja gjë është se unë kam lënë udhëzime: nëse ndodh diçka, thjesht t’i bombardojmë ata në nivele që nuk i kanë parë kurrë më parë”, shtoi ai.
I pyetur në lidhje me informacionet e ndara nga Izraeli për një komplot të ri iranian për ta vrarë, Trump e mohoi ekzistencën e një plani të ri, duke i thënë gazetës: “Jo, jo. Izraeli nuk doli me asgjë”.
Presidenti shtoi se Irani ka dashur prej vitesh që ai të vdiste. “Kam qenë i pari [në listën e Iranit për eliminim] prej kohësh dhe, e dini, kështu e ka jeta”.
