Ed Kuçi, i njohur gjerësisht nga publiku si Edi i Big Brother VIP Kosova, duket se po kalon një periudhë jo edhe aq të qetë në rrjetet sociale. Ish-banori i cili pas përfundimit të formatit televiziv u fokusua maksimalisht në botën e biznesit dhe kriptomonedhave, ka ndarë me ndjekësit e tij një lajm të papritur që lidhet pikërisht me profilin e tij në Instagram.
Përmes një statusi në Instastory, Edi ka bërë të ditur se llogaria e tij ka marrë një dënim serioz nga platforma. Ai ka treguar se për një muaj do të jetë i izoluar virtualisht, duke shkruar: “30 ditë nuk kam qasje në mesazhe, live në Instagram, për shkak të drejtësisë së përmbajtjes ekonomike që kam në Instagram”. Sipas tij, ky kufizim ka ardhur pasi platforma po përpiqet të bllokojë analizat e tij, duke pretenduar se “Instagrami nuk po dëshiron t’ju lërë ta shihni drejtësinë, faktet dhe analizat që kam ndaj tregut”.
Më tej, Edi ka hedhur edhe disa kunja të koduara për ndjekësit dhe rivalët e tij, duke u shprehur se “kështu që nuk surprizohem edhe kur më bëjnë bllokim (ban) përgjithmonë”.
Ai ka mbyllur reagimin e tij me një deklaratë mjaft thumbuese për ata që i qëndrojnë në hije: “Po më dhimbseren disa persona, sepse nëse nuk ekzistoj më, nuk kanë për të pasur më qëllime në jetë”. Se kujt i drejtohen saktësisht këto fjalë mbetet të shihet, por duket se rrugëtimi i tij në tregun e investimeve digjitale po përballet me pengesa të njëpasnjëshme.
