Ekspozita skandaloze “Masakrat në Kosovë 1998-1999”, e cila u hap më 24 mars në sheshin e Prishtinës, tashmë është mbyllur pasi u evidentuan pasaktësi në përmbajtjen e disa prej masakrave të ndodhura në Kosovë gjatë luftës.
Autori i ekspozitës, Shkëlzen Gashi, që është edhe drejtues i organizatës ADMOVERE, tha se të dhënat i kanë marrë nga Fondi për të Drejtën Humanitare, por këtë e mohoi ish-drejtuesja e këtij fondi, Natasha Kandiq.
E organizata joqeveritare “INTEGRA”, e cila bashkë me ADMOVERE qëndron prapa organizimit të kësaj ekspozite, më 21 shkurt kishte dërguar kërkesë në Kuvendin e Kosovës për mbështetje të këtij projekti.
Por, në kërkesën që tashmë është publikuar në media, kjo OJQ ka të listuar sponsorë tjerë, në krahasim me sponsorët që tash po i përmend.
“Të gjitha shpenzimet e ekspozitës: hulumtimi, hartimi i tekstit, përkthimi në anglisht, blerja e fotografive, kurimi, janë mbuluar nga donatorët: Ambasada e Zvicrës në Kosovë, Rockefeller Brothers Fund, Community Development Fund (CDF), Fondacioni i Kosovës për Shoqëri të Hapur (KFOS) dhe Cultural Heritage without Borders (CHwB)”.
“Përveç këtyre shpenzimeve tashmë të mbuluara, me këtë rast ju drejtohemi me kërkesë për mbështetje financiare vetëm për mbulimin e kostos së shtypit të paneleve dhe të ekspozitës, në vlerën totale prej 12,800 euro”, thuhet në kërkesën e OJQ “INTEGRA” drejtuar Kuvendit.
Megjithatë, në njoftimet që kjo organizatë, bashkë me “ADMOVERE”, i ka bërë në hapje të ekspozitës në rrjetin social Facebook, donatorët e përmendur në kërkesën drejtuar Kuvendit kanë ndryshuar – i vetmi i mbetur është CHwB.
“Kjo ekspozitë është realizuar me mbështetje financiare nga Kuvendi i Republikës së Kosovës, EXFIS, Libraria Dukagjini, JYSK, KFC, CHwB dhe Besa-Besë”, thuhet në një postim të ADMOVERE të bërë më 24 mars të këtij, në ditën kur edhe u hap ekspozita.
Të dhënat e publikuara në këtë ekspozitë, në veçanti ato për Masakrën në Burgun e Dubravës, të Krushës së Madhe dhe të Mejës, kanë pasaktësi.
Prandaj, Komuna e Prishtinës ua ka pezulluar lejen ekspozitës, dhe paraditen e sotme, panot janë larguar nga sheshi.
Prokuroria Speciale ka njoftuar se është e informuar mbi këto zhvillime, dhe se është duke i përcjellë me vëmendje.
Reagime pati edhe nga partitë politike opozitare, e edhe nga kryetarja e Kuvendit, Albulena Haxhiu.
