Thierry Henry e ka “përbuzur” Bundesligën gjatë orëve të fundit, me deklarata që mund t’i kthehen kundër për shkak të ashpërsisë së tyre. Ish-lojtari i Arsenalit dhe Barcelonës, në komentet për “Sky Sports” ka nxitur një debat të zjarrtë mbi cilësinë e kampionatit gjerman, duke e krahasuar me Premier League. Deklaratat e tij vijnë në një moment kur po diskutohet shumë mbi performancën e Florian Wirtz, i cili ende nuk ka treguar te Liverpool nivelin që shfaqi me Bayer Leverkusen.
Henry beson se një lojtar i mirë në Bundesligë mund të jetë i dobët në Premier League: “Lojtarët e Bundesligës gjithmonë më lënë dyshime. Si funksionon liga atje, mund të kesh shumë raste, të shënosh shumë gola dhe të japësh shumë asiste vetëm duke vrapuar. Në Premier League, lojtarët të ndjekin ritmin, kështu që një lojtar i ligës gjermane e ka vërtet të vështirë aty”. Dhe nuk e tha vetëm për Wirtz. As Xavi Simons nuk po shkëlqen te Tottenham, siç bëri te Leipzig.
Henry e sheh problemin jo vetëm tek lojtarët, por edhe te futbolli modern: “Sot krijohen shumë më pak aksione se në kohën tonë. Ekipet qëndrojnë shumë mbrapa dhe hapësirat janë të vogla, çka bën që lojtarët kreativë si Simons apo Wirtz të kenë më pak mundësi për të rrezikuar. Nëse trajnerët nuk lejojnë që të rinjtë të driblojnë dhe të bëjnë gabime, kur dihet se shpërblimi vjen nga rreziku, çfarë duhet të bëjnë ata?”
The post Thierry Henry “përbuz” Bundesligën: Yjet e saj bëhen të padukshëm në Premier League appeared first on Telesport.
