Procesi në Bellinzona hedh dritë mbi një rrjet islamist që ka vepruar ndërmjet Zvicrës dhe Kosovës për gati 10 vjet.
Gjykata Federale Penale e Zvicrës në Bellinzona do ta hapë të hënën procesin gjyqësor ndaj dy shqiptaro-kosovarëve, të cilët akuzohen nga autoritetet zvicerane për “pjesëmarrje në organizatë terroriste” me synim destabilizimin e një rajoni në Kosovë.
Të pandehurit janë një 37-vjeçar me origjinë nga Kosova dhe një 34-vjeçar me shtetësi të dyfishtë zvicerane dhe maqedonase, banorë në zonën e Gjenevës. Të arrestuar më 1 shtator të vitit 2022, ata ndodhen në paraburgim prej më shumë se tre vjetësh.
Në bazë të aktakuzës së Zyrës së Prokurorit Federal të Zvicrës, ata dyshohen se kanë qenë pjesë e një organizate terroriste, të cilën e kanë financuar. Ata dyshohen edhe për pastrim parash, korrupsion të zyrtarëve të huaj publikë, falsifikim dhe mashtrim.
Ata vepronin që nga viti 2015 në Gjenevë, në kuadër të “Grupit të Vitisë” me ideologji “salafi-xhihadiste” që synonte krijimin e një “shteti islamik” në Kosovë. Nga viti 2016 deri në 2022, sipas aktakuzës, ata kanë dërguar rreth 78. 000 euro në Kosovë. Një pjesë e tyre — rreth 10.000 euro — janë përdorur për të korruptuar prokurorë në Kosovë.
