Sipas një raporti të ri të Zyrës Federale të Statistikave, popullsia e Zvicrës pritet të arrijë 10 milion banorë deri në vitin 2040, kryesisht për shkak të emigracionit. Pa ardhjen e të huajve, popullsia zvicerane do të plaket dhe mund të fillojë të tkurret pas vitit 2035.
Rritja e numrit të të moshuarve paraqet sfida për ekonominë dhe sistemin e sigurimeve sociale, por emigracioni mund të zbusë këto efekte. Emigrantët kontribuojnë në mbushjen e boshllëqeve në tregun e punës, veçanërisht në sektorin shëndetësor, dhe përmirësojnë financat publike, transmeton albinfo.ch.
Raporti nënvizon gjithashtu sfidat: nevojën për investime në banesa, shkolla, infrastrukturë dhe integrimin e emigrantëve pa kualifikime. Megjithatë, autoritetet federale e shohin një Zvicër me 10 milion banorë si të arritshme dhe teknokratisht të menaxhueshme, duke e bërë vendin më të larmishëm dhe më të vjetër në dekadat e ardhshme.
