Analisti gjerman dhe anëtari i Democratization Policy Council (DPC), Bodo Weber, rezultatin e zgjedhjeve të 28 dhjetorit e ka cilësuar si një rezultat suprizë. Në një intervistë për Gazetën Express, Weber ka thënë se fitorja e Kurtit në këto zgjedhje ka dy faktorë kryesorë, inxhinieringun zgjedhor të diasporës dhe mungesën e pjekurisë tek partitë opozitare.
Shkruan: Besnik Velija
Weber ka thënë se zvarritja e zgjedhjeve të reja deri ne dhjetor, kohë kur shumica e diasporës udhëton drejt Kosovës për festën e vitit të ri, ka rezultuar si metodë efikase për Qeverinë Kurti për të instrumentalizuar nacionalizmin e diasporës.
“Për qeverinë Kurti, shtyrja e zgjedhjeve deri në fund të dhjetorit, kur një numër i madh i diasporës shqiptare ishte në vizitën e Vitit të Ri në Kosovë, të pranishëm për të votuar në vend, u dëshmua si një mënyrë shumë efikase për të instrumentalizuar nacionalizmin e diasporës, atë që Benedict Anderson e quajti nacionalizëm në distancë të gjatë”, ka thënë Weber për Gazetën Express.
Analisti gjerman e sheh si problematike në aspektin e demokracisë, faktin që fatin politik të Kosovës e caktojnë njerëzit që nuk jetojnë në Kosovë e të cilët praktikisht nuk do t’i ndjejnë pasojat e votës së tyre.
“Përcaktimi i fatit politik të vendit nga qytetarët e Kosovës që nuk jetojnë atje, d.m.th. në përgjithësi nuk do t’i ndiejnë pasojat e votës së tyre, është sigurisht shumë problematik nga pikëpamja e teorisë së demokracisë, dhe më shumë provë e hendekut të gjerë midis retorikës politike të bazuar në vlera të qeverisë Kurti dhe praktikës që mund të vërehet gjatë dy viteve të fundit. Në të njëjtën kohë, fitorja zgjedhore e VV duket se është gjithashtu rezultat i gjendjes së opozitës, me të tre partitë kryesore të opozitës në rrëmujë të thellë, përfshirë përballjen me një krizë lidershipi”, ka deklaruar Weber.
Duke folur për zhbllokimin e krizës politike dhe progresin e mundshëm në dialog, Weber ka deklaruar se është herët të flitet për zhbllokim të situatës politike, duke përmendur nevojën qe LVV të sigurojë përkrahjen e një prej partive opozitare për zgjedhjen e presidentit.
“Më duket shumë herët të flas për zhbllokimin e situatës politike. Së pari, ende po presim vendimin e Gjykatës Kushtetuese për zgjedhjen e vitit të kaluar, padyshim të paligjshme, të një nënkryetari serb të Kuvendit të Kosovës, duke anashkaluar shumicën e deputetëve serbë/Listën Serbe. Së dyti, VV-ja ende duhet të sigurojë të paktën mbështetjen e heshtur të njërës prej partive opozitare për zgjedhjen e një Presidenti të ri të Kosovës në mars, me shumë mundësi nga LDK-ja, partia opozitare me përçarjet më të thella të brendshme, ndërsa PDK-ja dhe AAK-ja përballen gjithashtu me gara për lidership.”, ka deklaruar Weber për Express.
Mes tjerash, Weber përmend edhe lirimin e mundshëm të Hashim Thaçit nga Haga dhe rikthimin e tjj në politikë si një prej skenarëve të mundshëm.
“Për më tepër, ekziston skenari i mundshëm i lirimit nga akuzat të ish-Presidentit Thaçi në Hagë dhe një rikthim në skenën politike në Kosovë”, shton analisti gjerman.
Sa i përket asaj nëse Kurti tani do të merret më shumë me Dialogun, Weber ka thënë se është shumë herët të flitet për një parashikim të tillë.
“Është shumë herët për të parashikuar. Gjatë mandatit të fundit të qeverisë Kurti, “trajtimi i procesit të normalizimit” de facto u përmbys në parandalimin e zbatimit të marrëveshjes Bazë/Ohrit dhe “integrimin” e njëanshëm (domethënë jashtë kornizës së dialogut politik dhe pa pëlqimin e BE-së/Perëndimit) të detyruar të serbëve të Kosovës, pra të komunave veriore/me shumicë serbe, ku BE-ja është më përgjegjësja për këtë zhvillim, për shkak të ngatërresës së saj në politika.”, ka deklaruar Weber për Express.
Weber për Express ka thënë se plani franko-gjerman i njohur si Marrëveshja Bazike dhe Aneksi i Ohrit është iniciativa më e keqe në historinë e dialogut që drejton BE. Sipas tij, kjo iniciativë është edhe më e keqe se ajo e korrigjimit të kufijve dhe shkëmbimit të territoreve mes Kosovës dhe Serbisë.
“Iniciativa gjermano-franceze/Marrëveshja Bazë&Ohri mbetet iniciativa më e keqe dhe më e dëmshme në historinë e dialogut politik të udhëhequr nga BE-ja, më e dëmshme edhe se episodi i shkëmbimit të territoreve. Në vend të një dialogu të thellë dhe strategjik, të rivendosur drejt negociatave për një marrëveshje vërtet gjithëpërfshirëse dhe përfundimtare me njohjen e plotë dhe formale të Kosovës nga Serbia në thelb, duke filluar me rindërtimin e besueshmërisë dhe autoritetit të BE-së ndaj Prishtinës dhe Beogradit pas vitit 2020, Brukseli (Berlini) zgjodhi një qasje jostrategjike të ngatërrimit”, ka deklaruar ai.
Marrëveshjen e Ohrit, Weber e quan si një marrëveshje te sajuar, dhe ish-kryediplomatin evropian, Josep Borell, si negociatori më të keq në histori të Dialogut.
“Një nismë e bazuar në ripërtëritjen e politikës tashmë të dështuar të qetësimit perëndimor ndaj Beogradit, e cila vetëm sa e inkurajoi edhe më tej Vuçiçin në bindjen e tij (të saktë) se Perëndimi është i dobët, dhe e largoi Kurtin – vetë një partner shumë i vështirë – duke e bërë kështu nismën të dënuar me dështim që në fillim.Në fund, nisma u reduktua në atë që Përfaqësuesi i Lartë Borrell, negociatori më i dobët në historinë e dialogut të BE-së, në Ohër shpalli suksesin, pra e sajoj një marrëveshje, ndërkohë që si Beogradi ashtu edhe Prishtina, që nga dita e parë, u përqendruan në parandalimin e zbatimit të saj. Ndërkohë, BE-ja/Perëndimi shikonte në mënyrë pasive përshkallëzimin e paprecedentë në veri, për të cilin mban një pjesë të madhe të përgjegjësisë.”, ka shtuar Weber.
“Fatkeqësisht, sipas deklaratave të para të kancelarit të ri gjerman Merz, deri tani nuk ka vullnet politik në kryeqytetet kryesore evropiane për një kthesë strategjike në dialogun politik, ashtu siç nuk ka as për ndryshimin e marrëdhënies së dështuar me regjimin e Vuçiçit. Prandaj, mund të pritet që BE-ja të vazhdojë të insistojë në zbatimin e marrëveshjes Bruksel-Ohër, pra që të gjitha palët të vazhdojnë të sillen sikur ekziston diçka konkrete, edhe pse në fakt nuk ka”, ka përfunduar Weber./GazetaExpress/
