Albert Shabani, i njohur si një nga mbështetësit më të flaktë të Lëvizjes Vetëvendosje, duket se ka hequr dorë nga ideja për t’u larguar drejt Gjermanisë, një ditë pasi kishte bërë publike vendimin për emigrim.
Më 25 janar 2026, Shabani kishte njoftuar se po largohej nga Kosova për shkak të vështirësive financiare dhe mungesës së përkrahjes pas zgjedhjeve.
Ai kishte shprehur zhgënjimin ndaj LVV-së dhe kishte publikuar një mesazh emocional, ku fliste për nënën e tij dhe për sakrificat e familjes, duke lënë të kuptohej se largimi ishte i pashmangshëm.
Por një ditë më vonë, situata mori tjetër drejtim.
Kandidati i PDK-së për deputet, Qendrim Kryeziu, ka bërë të ditur se e ka pritur Shabanin në zyrën e tij dhe se i ka siguruar një vend pune në kompaninë ISP – Broadcast.
Në një postim në Facebook, Kryeziu shkruan se e ka bindur Shabanin të mos e ndërmarrë hapin e largimit nga vendi dhe se nga 7 marsi ai do të jetë pjesë e kompanisë së tij.
“Jam i nderuar që pata rastin ta pres sot në zyrën time dhe ta bind që të mos e ndërmarrë këtë hap të dhimbshëm. Që nga 7 marsi, ai do të jetë pjesë e kompanisë ISP – Broadcast”, ka shkruar Kryeziu.
Ai ka theksuar se, pavarësisht bindjeve politike, çdo qytetar ka të drejtë të ruajë preferencat e tij, por sipas tij, Kosova duhet të jetë mbi partitë.
“Albert Shabani dhe të tjerë si ai kanë të drejtë t’i ruajnë bindjet dhe preferencat e tyre politike pa asnjë presion. Por një gjë duhet ta kemi të qartë: Kosova është mbi partitë”, ka shtuar ai, duke e cilësuar ikjen e të rinjve si një nga dëmet më të mëdha për shtetin.
Lidhur me vendimin për të qëndruar në Kosovë, dhe rastin e punësimit të tij, ka reaguar edhe vetë Shabani.
Ai ka sqaruar se punësimi i tij nuk ka të bëjë me asnjë aderim politik.
“Pas një mali komentesh rreth çështjes ku i nderuari z. Qëndrim Kryeziu më ka hapur derën për punësim, ndiej për obligim të sqaroj disa gjëra. Unë nuk kam aderuar në asnjë parti politike. Thjesht do të punësohem. Kam fëmijë, kam familje dhe, po, edhe unë duhet të punoj. Bëhet fjalë për marrëveshje punësimi, e jo aderim politik”, ka shkruar Shabani.
Ai ka theksuar se bindjet e tij politike mbesin të pandryshuara dhe se vendi i punës nuk ka lidhje me qëndrimet politike.
“Bindja dhe qëndrimi im politik mbesin të palëkundura dhe nuk lëkunden për asnjë kusht. Sipas disa komentuesve, del se unë paska dashur vetëm të merrem me aktivitet, e jo të punësohem. Kjo tregon një qasje jo të drejtë dhe jo reale. Secili prej jush, në vendet ku punoni, keni kolegë që përkrahin parti të ndryshme politike, dhe kjo është krejtësisht normale. Vendi i punësimit dhe bindja politike nuk kanë asgjë të përbashkët”, ka shtuar ai./Paparaci
