KF Vushtrria e ka fituar ndeshjen në tavolinë ndaj Dukagjinit të Klinës, pasi që dje kishte humbur përballjen në Ligën e Parë me rezultat 4 – 3 në xhiron e 28-të të kësaj lige, raporton Fokusi.info.
Kjo ka ndodhur pas një ankese që ka bërë klubi i Vëllaznimit nga Gjakova, dhe e miratuar nga Komisioni i Garave të Ligës së Parë.
Në arsyetim theksohet se lojtari i Dukagjinit, Granit Elezaj, ishte aktivizuar në lojë edhe pse kishte marrë katër kartonë të verdhë në ndeshjet paraprake.
Në konstatim theksohet se lojtari ishte ndëshkuar me të verdhë në javën e parë në ndeshjen Dukagjini – Fushë Kosova, në javën e 22-të në ndeshjen Dukagjini – Vllaznia, në javën e 23-të në ndeshjen Vitia – Dukagjini dhe në xhiron e 27-të në ndeshjen ndaj Bashkimit. Pas këtyre kartonëve ai është dashur të pushojë në javën e 28-të.
“Por i njëjti është aktivizuar në lojë, andaj kemi shkelje të Propozicioneve, pikërisht të nenit 53, paragrafi 1, prandaj ankesa e KF Vëllaznimi miratohet si e bazuar dhe ndeshja KF Dukagjini – KF Vushtrria, regjistrohet me rezultat zyrtar 3 – 0 për KF Vushtrria”, thuhet në njoftim të Komisionit të Garave.
Pas këtij vendimi, Vushtrria matematikisht bëhet fituese e Ligës së Parë, ndërsa Dukagjini rrezikon kualifikimin direkt.
Tash Dukagjini është i dyti me 56 pikë, vetëm një më shumë se Besa që është e treta dhe vetëm dy më shumë se Vëllaznimi që është i katërti, me dy xhiro deri në fund të sezonit. Pozitat tre dhe katër çojnë në barazh.
