Drejtori i Përgjithshëm i Policisë së Kosovës, Gazmend Hoxha ka njoftuar se janë intervistuar disa persona si dëshmitarë të mundshëm në lidhje me vrasjen e policit Muhamed Lika në komunën e Kaçanikut, i cili u vra para shtëpisë së tij.
Hoxha ka thënë se policia është duke punuar në ekzaminimin e dëshmive, ndonëse akoma s’është arrestuar asnjë person lidhur me këtë rast.
“Është një rast shumë i rëndë që ka ndodhur dy net më parë. Policia ka dalë menjëherë në vendin e ngjarjes dhe ka intervistuar disa persona si dëshmitarë të mundshëm. Po punohet në ekzaminimin e dëshmive në aspektin teknik. Ende nuk kemi arritur të verifikojmë nëse ka ndonjë lidhje mes rastit të vrasjes dhe problemeve të mëhershme”, ka deklaruar Hoxha për televizionin Tëvë 1.
Prokuroria Themelore në Ferizaj, të mërkurën, në një konferencë për media, ka bërë të ditur se nga provat materiale të siguruara ka arritur të konstatojë se zyrtari policor është vrarë të martën në mbrëmje nga dy persona, në Komunën e Kaçanikut.
Zyrtari policor, sipas prokurorisë është qëlluar në shkallët e ndërtesës ku jetonte.
Policia e Kosovës ka bërë të ditur se Muhamed Lika ishte gjetur i plagosur rëndë në hyrje të ndërtesës së tij të martën rreth orës 23:00.
Ai ishte transportuar për në Qendrën e Mjekësisë në Kaçanik, por nuk arriti t’i mbijetonte plagëve.
Shkaqet se si ka ardhur deri te kjo ngjarje nuk dihen ende sipas Policisë së Kosovës.
