Viti 2026 për Vinícius Júnior ka nisur me dëshirën për të kthyer faqe, pas një periudhe të vështirë, por shifrat vazhdojnë të jenë shqetësuese. Sulmuesi brazilian u paraqit në sfidën ndaj Betisit me 14 ndeshje pa gol me Real Madridin, që bëhen 17 duke përfshirë edhe kombëtaren, pas fishkëllimave të dëgjuara në “Santiago Bernabéu” në ndeshjen e fundit të vitit 2025 kundër Sevilla.
Për të sqaruar gjendjen e tij shpirtërore, Vinícius kishte publikuar një mesazh pozitiv në rrjetet sociale: “Qoftë një vit i jashtëzakonshëm 2026! Hala Madrid gjithmonë! Ju dua”. Dhe sinjalet e para nga tribuna ishin inkurajuese. Në momentin kur emri i tij u shpall nga altoparlantët e stadiumit, fishkëllimat pothuajse munguan.
Në pjesën e parë, Vinícius tregoi disa shkëndija të lojtarit vendimtar: krijoi raste, ishte i rrezikshëm në krah dhe protestoi për një penallti të paakorduar. Megjithatë, me kalimin e minutave, ndikimi i tij në lojë ra ndjeshëm. U bë më pak pjesëmarrës, humbi inciativën dhe një moment shpërqendrimi i tij kontribuoi në golin e Betisit për 3-1.
Edhe pse Real Madridi arriti fitoren, paraqitja e Vinícius mbeti nën pritshmëri. Vetëm një rast i krijuar, pak driblime të suksesshme dhe një goditje jashtë kuadratit. Në fundin e pjesës së dytë, trajneri Xabi Alonso vendosi ta zëvendësonte me Arda Güler. Braziliani përshëndeti trajnerin me qetësi dhe u drejtua drejt tunelit të stadiumit pa shfaqur shenja nervozizmi.
Thatësira tashmë shkon në 15 ndeshje radhazi pa gol me Real Madridin, duke e çuar totalin në 18 ndeshje pa realizim në të gjitha kompeticionet. Një moment delikat për Vinícius Jr., sidomos në një fazë kyçe të sezonit dhe me rinovimin e kontratës ende të paqartë, ndërsa aktualisht ndodhet vetëm 18 muaj nga skadenca.
The post Vinícius Jr. pa fishkëllima, por sërish pa gola. Braziliani e zgjeron “thatësirën” në 18 ndeshje appeared first on Telesport.
