“Vidovdani” nën mbikëqyrje të rreptë, përplasen Kurti e Vuçiq

Kryeministri në detyrë, Albin Kurti, ka paralajmëruar për përpjekje të mundshme për destabilizim nga grupe të organizuara që pritet të vijnë nga Serbia, Mali i Zi dhe Bosnjë e Hercegovina. Sipas tij, festimi i Vidovdanit është shndërruar në një mjet për retorikë nacionaliste dhe propagandë politike nga Beogradi.

“Ka përpjekje që ky tubim të jetë sa më masiv, përmes organizimit të grupeve provokuese që mbajnë simbole nacionaliste serbe e ruse. Kjo bie ndesh me Kushtetutën dhe vlerat demokratike të Kosovës”, deklaroi Kurti në mbledhjen e Qeverisë.

Në anën tjetër, presidenti i Serbisë, Aleksandar Vuçiq, ka reaguar duke e cilësuar këtë ndalim si mohim i të drejtave kombëtare të serbëve.

“Do të vijë dita kur do të veshim flamuj dhe bluza serbe lirisht, kudo që të jemi”, deklaroi ai për mediat serbe, duke lavdëruar ata që “mbijetojnë” në Kosovë.

Policia e Kosovës ka ndërmarrë masa të shumta sigurie dhe ka shpalosur planin operacional para përfaqësuesve vendorë dhe ndërkombëtarë.

Në njoftimin e saj, Policia ka kërkuar nga qytetarët të shmangin çdo lloj provokimi dhe të bashkëpunojnë me autoritetet.

Manifestimet e “Vidovdanit” mbeten një ndër ngjarjet më të ndjeshme në aspektin e sigurisë në Kosovë, për çka institucionet po apelojnë për maturi dhe respektim të ligjit për të ruajtur rendin dhe paqen publike./Telegrafi/