Deputeti i zgjedhur Veton Berisha nga Partia Liberiane Egjiptiane pas takimit sot me kryeministrin në detyrë, Albin Kurti, në kuadër të takimeve të tij me partitë e komuniteteve joshumicë për forimin e Qeverisë, tha se s’ka vija të kuqe ndaj Lëvizjes Vetëvendosje dhe as partive të tjera.
Ai tha se në këtë takim i ka kërkuar Kurtit më shumë zhvillim për komunitetin egjiptian, por tha se takimet për të konfirmuar votën e tij do të vazhdojnë.
“Biseduam për një bashkëpunim të mundshëm mes nesh. Normalisht, që ne si Parti Liberiane Egjiptiane për shkak të kërkesave tona që janë në raportin për zhvillimin e komunitetit egjiptian që janë një nevojë e domosdoshme për të investuar në komunitet. Ne në parim nuk kemi asnjë vijë të kuqe me askënd, në këtë rast as me kryeministrin Kurti, por me askënd në Kosovë. Normalisht që ne i patëm kërkesat tona dhe kërkuam që nëse hymë në Qeveri me pasë mundësi që të ndikojmë në politikat qeveritare për ndryshim”.
Berisha tha se e kanë dorëzuar një program të partisë që kanë pasë në fushatë.
“Ditëve në vijim do të kemi takime prapë. Ky ishte takimi i parë. Ne do të jemi Kuvend kur mbahet seanca konstituive sepse jemi pjesë e Kuvendit. Ndërsa për pjesën tjetër të një formimi qeveritar sigurisht që ne e presim një moment tjetër”.
