Donald Trump ka bërë thirrje që të hiqet portreti i tij pasi është “me të vërtetë më i keqi”.
Presidenti amerikan pretendoi se portreti i artistes britanike Sarah Boardman, i cili aktualisht është i varur në Kapitolin e Shtetit të Kolorados, ishte “shtrembëruar me qëllim”.
Duke postuar në Truth Social, ai tha: “Askujt nuk i pëlqen një foto apo pikturë e keqe e vetvetes, por ajo në Kolorado, në Kapitolin e Shtetit, e vendosur nga Guvernatori, së bashku me të gjithë presidentët e tjerë, u shtrembërua qëllimisht në një nivel që edhe unë, ndoshta, nuk e kam parë kurrë më parë.”
Ai tha se portreti i ish-presidentit amerikan, Barack Obama, nga e njëjta artiste, ishte “i mrekullueshëm”, por portreti i tij “ishte me të vërtetë më i keqi”, shkruan skynews, përcjell Telegrafi.
Duke iu referuar artistes, koleksioni i portreteve zyrtare të të cilës përfshin gjithashtu një të ish-presidentit George W. Bush, Trump tha se “ajo duhet të ketë humbur talentin e saj ndërsa u rrit”.
Ai më pas shtoi: “Në çdo rast, do të preferoja shumë të mos kisha një portret sesa ta kisha këtë.”
Bëhet e ditur se portreti i Trumpit nga Boardman ka qenë i varur në Kapitolin e Shtetit që nga viti 2019.
Është e paqartë se çfarë e shkaktoi ankesën e presidentit amerikan.
Ndryshe, kur portreti u zbulua në vitin 2019, Boardman postoi fotografi në internet dhe tha se ishte një “ditë e shkëlqyer”.
Ajo shkroi: “Ju lutem tregoni respekt – kjo ka të bëjë me portretin, jo politikën”.
