Egzona Bulliqi, vajza e kryetarit të Podujevës, Shpejtim Bulliqi është afër punësimit si ‘zyrtare e lartë për edukim në fëmijëri të hershme’ në Ministrinë e Arsimit e udhëhequr nga ministrja në detyrë, Arbërie Nagavci. Egzona është radhitur në listën e kandidatëve të aprovuar.
Ministria e Arsimit, Shkencës, Teknologjisë dhe Inovacionit, me 10 mars të këtij viti ka hapur konkurs për pozitën e punës “Zyrtar i lartë për edukim në fëmijëri të hershme”.
Afati për aplikim ka qenë deri me nëntë prill.
Gjithësej janë 22 kandidat që kanë kaluar në listën e të aprovuarve.
Ndërkohë, afati për aplikim ishte shtyrë edhe 15 ditë, si shkak i “numrit të madh të procedurave të rekrutimit në zhvillim, dhe për përfundimin e procedurës së verifikimit të aplikacioneve”.
Në mesin e kandidatëve të aprovuar është Egzona Bulliqi.
Egzona Bulliqi është vajza e kryetarit të komunës së Podujevës, Shpejtim Bulliqi, i partisë së Vetëvendosjes.
Gazeta Insajderi ka siguruar edhe një foto të Shpejtim Bulliqit, ku shihet me vajzën e tij Egzonën.
Insajderi ka pyetur Ministrinë e Arsimit, se a ka ndonjë avancim me ndikim nga babai i saj, Shpejtim Bulliqi, apo ndonjë konflikt interesi, mirëpo deri në publikimin e këtij teksti nuk kanë kthyer ndonjë përgjigje.
Para disa muajve Gazeta Insajderi ka raportuar edhe për punësimin e djalit të Shpejtim Bulliqit, si zyrtarë në Qendrën e Studentëve, në pozitën e zyrtarit për Sport dhe Rekreacion.
Në konkursin e hapur ishin cekur dy kritere. E Para ‘Diplomë Universitare’ dhe e dyta ‘të paktën 1 vit përvojë pune në këtë lami”.
Kandidati i përzgjedhur, Arbër Bulliqi ka ofruar dëshmi për të parën pasi ai ka diplomuar në Fakultetin e Edukimit Fizik dhe Sporteve në mars të vitit 2023.
Gazeta Insajderi ka konfirmuar këtë nga postimi i Shpejtim Bulliqit në Facebook I cili ka uruar të birin për diplomim.
Por, dyshimet ishin tek përvoja e punës. Ende nuk dihet nëse Arbër Bulliqi ka ofruar dëshmi se ka pasur 1 vit përvojë pune në fushën e sporteve dhe rekreacioneve pasi ai ka diplomuar vitin e kaluar.
