“Është çështje kohe se kur municionet do të mbarojnë”, tha një person i njohur me dërgesat amerikane.
Ukraina rrezikon të përballet me mungesë të sistemeve të mbrojtjes ajrore pasi Pentagoni rishikoi programin e saj të ndihmës ushtarake, duke ngadalësuar dërgesat në një kohë kur Rusia po intensifikon sulmet ajrore.
Kështu bën të ditur gazeta Financial Times duke iu referuar zyrtarëve perëndimorë dhe ukrainas.
Presioni mbi furnizimet është rritur pas disa muajsh dërgesash të parregullta dhe më të vogla se sa pritej që nga direktiva e Pentagonit në qershor.
Zyrtarët dhe analistët paralajmërojnë se nëse Moska vazhdon përshkallëzimin e saj ose thjesht mban norma më të larta të sulmeve me raketa dhe dronë, njësitë e mbrojtjes ajrore ukrainase mund të përballen me një mungesë.
“Është çështje kohe se kur municionet do të mbarojnë”, tha një person i njohur me dërgesat amerikane të materialeve të mbrojtjes ajrore në Ukrainë.
Ngadalësimi është veçanërisht shqetësues sepse raketat e tjera të blera direkt nga prodhuesit në kuadër të Iniciativës së veçantë të Ndihmës për Sigurinë e Ukrainës prodhohen në grupe, duke krijuar boshllëqe midis dërgesave.
Vendet e BE-së gjithashtu kanë rënë dakord kohët e fundit të dërgojnë sisteme dhe municione të mbrojtjes ajrore nga rezervat e tyre dhe të blejnë furnizime shtesë nga SHBA-të për dërgesë në Ukrainë, por këto dërgesa deri më tani janë materializuar vetëm pjesërisht.
Ngadalësimi i dërgesave të armëve amerikane pasoi një memo të shkruar në fillim të qershorit nga Elbridge Colby, një zyrtar i lartë i politikave të Pentagonit, drejtuar Sekretarit të Mbrojtjes Pete Hegseth.
Colby, i cili deklaroi se dëshiron të riorientojë ushtrinë amerikane për t’iu kundërvënë kërcënimit në rritje nga Kina, argumentoi në memo se kërkesat e Ukrainës për armë amerikane mund të shterojnë më tej rezervat tashmë të sforcuara të Pentagonit.
