Ukraina nuk mund të garantojë sigurinë e përfaqësuesve nga vendet e tjera në ceremoninë përkujtimore të Luftës së Dytë Botërore në Moskë më 9 maj.
Kështu, siç raportojnë mediat e huaja, përcjell Telegrafi, ka thënë presidenti Volodymyr Zelensky të shtunën.
“Ne nuk mund të mbajmë përgjegjësi për atë që ndodh në territorin e Federatës Ruse”, i tha ai agjencisë së lajmeve Interfax-Ukrainë.
Ai paralajmëroi se Rusia mund të kryejë sulme zjarrvënëse ose të vërë në lëvizje eksplozivë dhe t’ia hedhë fajin Kievit, duke theksuar se Ukraina sillet “me shumë kujdes dhe respekt ndaj vendeve të tjera”.
Presidenti rus Vladimir Putin ka shpallur një armëpushim të njëanshëm për 8 deri në 11 maj që përkon me Paradën vjetore të Fitores në Sheshin e Kuq të Moskës për të shënuar fundin e Luftës së Dytë Botërore, e cila festohet në Rusi më 9 maj.
Moska hodhi poshtë një propozim nga Kievi për të zgjatur armëpushimin në një armëpushim gjithëpërfshirës 30-ditor.
