Pischane në Donetsk kthehet nën kontrollin e Kievit, ndërsa Zelensky rinovon thirrjen për përfundimin e luftës “me paqe të drejtë dhe të qëndrueshme”.
Forcat ukrainase kanë rimarrë një fshat në vijën e frontit në lindje të vendit, mes shenjave që avancimi i Rusisë mund të ngadalësohet dhe ndërsa Volodymyr Zelensky rinovoi thirrjen e tij që luftimet të përfundojnë “me një paqe të drejtë dhe të qëndrueshme”.
Të dielën forcat ukrainase morën përsëri fshatin Pischane, në jug-perëndim të qytetit të Pokrovsk, thanë zyrtarët ushtarakë. Njësitë ruse kishin arritur fitime të shpejta në zonë në dhjetor dhe janar, duke kapur një varg vendbanimesh dhe duke kërcënuar se do të ndërpresin Pokrovsk.
Që nga fillimi i këtij muaji, përparimi i rusëve ka ngecur. Blogerët rusë thonë se dronët ukrainas dominojnë qiellin dhe kanë shkatërruar në mënyrë metodike automjete të blinduara. Trupat ruse duhet të ecin 10 km në këmbë, dhe shumë prej tyre nuk arrijnë të gjallë, thonë ata.
Shkalla e lartë e viktimave ruse ka pasur një efekt demoralizues në njësitë luftarake përpara. Kushtet me borë dhe mungesa e mbulesës së pemëve e kanë bërë më të lehtë për mbrojtësit ukrainas të marrin ushtarët e këmbësorisë përpara se të arrijnë në vijën e kontaktit, shtojnë ata.
Duke folur në Konferencën e Sigurisë në Mynih, Zelensky konfirmoi se situata në drejtimin e Pokrovsk kohët e fundit ishte përmirësuar. Ripushtimi i fshatit forcon argumentin e Kievit se fitorja e Moskës nuk është e pashmangshme dhe se me mbështetjen e mjaftueshme perëndimore ajo mund të rikthejë territorin. Togat ukrainase kanë kundërsulmuar gjithashtu rreth fshatit fqinj të Kotlyne.
Përparimet ruse janë bërë me një kosto të madhe njerëzore. Sipas Major Viktor Trehubov, një zëdhënës i forcave tokësore të Ukrainës në lindje, 7 mijë ushtarë rusë vdiqën në janar në betejën për Pokrovsk dhe 15 mijë janë plagosur ose të zhdukur.
Zelensky tha në Mynih se Kremlini ishte gati të zgjeronte luftën e tij në Ukrainë dhe të sulmonte NATO-n. Në një intervistë me transmetuesin NBC, ai tha se Vladimir Putin do të përfitonte nga një aleancë e dobësuar nëse SHBA-të tërhiqnin ushtrinë e tyre nga Evropa.
“Ne besojmë se Putini do të bëjë luftë kundër NATO-s”, parashikoi Zelensky. Ai tha se presidentit rus nuk duhet t’i besohet në asnjë rrethanë, por theksoi se Donald Trump ka ende fuqi për ta shtyrë atë në negociata.
Zelenskyy sugjeroi se Putini nuk dëshiron një marrëveshje të vërtetë paqeje dhe në vend të kësaj kërkonte luftë “për të mbajtur kontrollin e tij në pushtet”. Ai tha se gjatë javës së kaluar Rusia kishte goditur Ukrainën me afro 1 mijë e 220 bomba ajrore dhe më shumë se 850 drone sulmuese, si dhe 40 raketa të tjera.
“Ukraina po mbron… por ne kemi nevojë për më shumë sisteme të mbrojtjes ajrore për të mbrojtur jetën e ukrainasve. Evropa dhe bota duhet të mbrohen më mirë nga një e keqe e tillë dhe të përgatiten për t’u përballur me të”, shkroi ai në rrjetet sociale të dielën.
Ai shtoi: “Kjo kërkon një politikë të jashtme të fortë, të bashkuar dhe presion ndaj Putinit, i cili filloi këtë luftë dhe tani po e zgjeron atë globalisht. Së bashku me Evropën, SHBA-të dhe të gjithë partnerët tanë, ne mund ta përfundojmë këtë luftë me një paqe të drejtë dhe të qëndrueshme”.
Zyrtarët në Kiev, ndërkohë, konfirmuan deklaratën e Zelensky gjatë fundjavës se Ukraina ishte mbajtur në errësirë për negociatat për një samit midis Putinit dhe Trump. “Pashë që dikush tha se do të kishte një takim në Arabinë Saudite. Nuk e di se çfarë është”, tha Zelensky të shtunën.
