Përmes një zëdhënësi, UEFA ka përgënjeshtruar mundësinë për të kufizuar qytetet pritëse që në vitin 2021 do të presin Evropianin e futbollit që ishte parashikuar këtë verë, por që u shty si pasojë e emergjencës së koronavirusit.
“UEFA Euro 2020 do të zhvillohet mes 11 qershorit dhe 11 korrikut 2021 me qëllimin për të pasur të njëjtin kalendar të ndeshjeve dhe qyteteve pritëse”, tha zëdhënësi i UEFA-s për kanalin britanik “Sky Sports News”.
“Gjithsesi, në këtë fazë programi i ndeshjeve nuk është zyrtarisht i konfirmuar. UEFA është në kontakt të vazhdueshëm me të gjitha 12 qytetet pritëse mbi këtë çështje dhe nëse do të jetë e nevojshme, lajmërimet e reja do të vijnë në momentin e duhur”.
Kontaktet me 12 qytetet pritëse (Amsterdam, Baku, Bilbao, Bukuresht, Budapest, Kopenaghen, Dublin, Gllasgou, Londër, Mynih, Romë dhe Shën Pjetërburg) po i mban Martin Kallen, CEO i UEFA Events.
Lajmi se do të reduktohej numri i qyteteve ishte publikuar nga shtypi britanik dhe UEFA menjëherë ka hedhur poshtë këtë mundësi.
