Deputetja e LDK-së, Arjeta Abazi Salihu e cila vjen nga dega e Podujevës është përmendur mbrëmë se është synim i LVV-së që ta marrin dhe kësisoj LVV të arrijë t’i sigurojë numrat e mjaftueshëm për krijimin e qeverisë.
Deputetja Abazi Salihu e ka quajtur gjithë këtë thjesht si një ëndërr, e që sipas saj nuk do të thotë që secila ëndërr bëhet realitet.
“Në këtë rast, kjo më tepër duket sikur një ëndërr, gjë që ëndërrimet janë legjitime, janë të natyrshme dhe njerëzit kanë të drejtë edhe të ëndërrojnë, kanë të drejtë edhe të imagjinojnë. Por, nuk do të thotë që secila ëndërr bëhet realitet. Madje, në këtë rast hiq se hiq”, ka thënë Abazi Salihu për gazetaBlic.
Ajo tutje ka shtuar se identitetin politik nuk e ka në pazar dhe se identifikimi i saj me LDK-në, nuk është i ditëve të sotme, dhe se atë e ka të shenjtë.
“Identitetin im politik nuk është në pazar as sot dhe nuk do të jetë kurrë. Identifikimi im me LDK-në, nuk është i ditëve të sotme, dhe për më tepër atë e kam të shenjtë. Prandaj, diçka që është e shenjtë nuk është në pazar”, ka theksuar ajo.
