Ka pasur shumë raporte kontradiktore rreth asaj se kush e shkroi planin me 28 pika për t’i dhënë fund luftës në Ukrainë, i cili shihet gjerësisht se favorizon Rusinë pasi mbështet disa nga pozicionet kryesore maksimaliste të Moskës.
Një grup senatorësh amerikanë thonë se Marco Rubio u tha atyre se plani në fakt nuk është një propozim amerikan dhe nuk pasqyron qëndrimin zyrtar të Washingtonit, pretendime të cilat janë kundërshtuar shumë nga departamenti i shtetit i SHBA-ve.
Senatorët pretendojnë se sekretari i shtetit u tha atyre se ishte një plan rus i zbuluar nga një përfaqësues i Moskës që SHBA-të kishin rënë dakord ta kalonin në Ukrainë për ta shqyrtuar dhe më pas për t’iu përgjigjur.
“Sekretari Rubio na telefonoi këtë pasdite. Mendoj se na e bëri shumë të qartë se ne jemi marrësit e një propozimi që iu dorëzua njërit prej përfaqësuesve tanë. Nuk është rekomandimi ynë, nuk është plani ynë i paqes. Është një propozim që u pranua”, u citua të ketë thënë të shtunën senatori republikan Mike Rounds, i cili është anëtar i komitetit të inteligjencës së Senatit.
Marco Rubio ka këmbëngulur se plani është hartuar nga Uashingtoni.
“Si ndërmjetës, ne kemi bërë rregullime për ta ndarë atë. Dhe nuk e publikuam”, shtoi ai.
Senatori i pavarur i Maine, Angus King, tha se Rubio u tha atyre se plani “nuk ishte plani i administratës”, por më shumë i ngjashëm me një “listë dëshirash të rusëve”.
Pas komenteve, Rubio u kundërpërgjigj duke thënë: “Propozimi i paqes është hartuar nga SHBA-të. Ai ofrohet si një kornizë e fortë për negociatat e vazhdueshme. Ai bazohet në kontributin nga pala ruse. Por ai bazohet gjithashtu në kontributin e mëparshëm dhe të vazhdueshëm nga Ukraina”.
Kryeministri polak, Donald Tusk, një nga aleatët më të vendosur të Ukrainës, shtoi spekulimet këtë mëngjes, duke thënë në një postim në X se “do të ishte mirë të dihej me siguri se kush është autori i planit dhe ku është krijuar” para se të fillojë puna për diskutimin e dispozitave të tij.
