Donald Trump ka paralajmëruar se ushtria amerikane “mund të” vendoset në Nigeri ose të kryejë sulme ajrore, për të ndaluar atë që ai e quajti vrasjen e një numri të madh të të krishterëve.
Duke postuar në Truth Social javën e kaluar, presidenti amerikan pretendoi se islamistët radikalë po kryejnë “masakër masive” dhe Krishterimi “po përballet me një kërcënim ekzistencial” në kombin e Afrikës Perëndimore.
Të dielën, Trump u pyet nëse ai parashikonte trupa në tokë apo sulme ajrore në Nigeri, transmeton Telegrafi.
“Mund të jetë. Dua të them, gjëra të tjera. Unë parashikoj shumë gjëra. Ata po vrasin një numër rekord të krishterësh në Nigeri. Ata po vrasin të krishterët dhe po i vrasin ata në numër shumë të madh. Nuk do ta lejojmë këtë të ndodhë”, u tha ai gazetarëve gjatë një fluturimi në Air Force One.
Nigeria i është përgjigjur kërcënimeve për veprime ushtarake amerikane, duke sugjeruar se do të mirëpriste ndihmën në përballjen me kryengritësit islamikë, por këmbënguli të dielën se Amerika duhet të respektojë sovranitetin e saj.
“Ne mirëpresim ndihmën e SHBA-së për sa kohë që ajo njeh integritetin tonë territorial”, tha për Reuters, Daniel Bwala, një këshilltar i presidentit nigerian Bola Tinubu.
Por Bwala gjithashtu kërkoi të minimizonte tensionet midis dy kombeve, pavarësisht se Trump e quajti Nigerinë një “vend të turpëruar”.
Gjatë fundjavës, Tinubu gjithashtu kundërshtoi pretendimet për intolerancë fetare dhe mbrojti përpjekjet e vendit të tij për të mbrojtur lirinë fetare.
“Karakterizimi i Nigerisë si intolerante fetare nuk pasqyron realitetin tonë kombëtar, as nuk merr në konsideratë përpjekjet e vazhdueshme dhe të sinqerta të qeverisë për të mbrojtur lirinë e fesë dhe besimeve për të gjithë nigerianët”, tha Tinubu në një deklaratë.
Nigeria është vendosur në një listë të SHBA-së të vendeve “me shqetësim të veçantë” për shkak të shkeljeve të lirisë fetare.
Lista përfshin gjithashtu Korenë e Veriut, Rusinë, Arabinë Saudite, Iranin, Pakistanin dhe Kina.
Boko Haram – i cili rrëmbeu më shumë se 270 nxënëse shkolle në vitin 2014 – është grupi kryesor i cituar në paralajmërimet e mëparshme nga qeveritë amerikane dhe ndërkombëtare.
Grupi ka kryer “shkelje të rënda të lirisë fetare”, sipas një raporti të vitit 2021 nga Komisioni dypartiak i SHBA-së për Lirinë Fetare Ndërkombëtare.
Ai tha se më shumë se 37,000 njerëz ishin vrarë nga grupet islamike në Nigeri që nga viti 2011.
Nigeria është një vend me më shumë se 200 milionë banorë, i cili është i ndarë midis veriut kryesisht mysliman dhe jugut kryesisht të krishterë.
Një kryengritje islamiste është zvarritur për më shumë se 15 vjet dhe është kryesisht e kufizuar në verilindje të vendit, i cili është me shumicë myslimane.
Ndërsa të krishterë janë vrarë, shumica e viktimave kanë qenë myslimanë, thonë analistët.
