Presidenti i Shteteve të Bashkuara, Donald Trump, ka komunikuar një seri të re tarifash për një sërë vendesh që eksportojnë mallra në ShBA, duke filluar nga 1 shkurti.
Trump ka thënë se këto do të mbeten në fuqi “deri në momentin kur të arrihet një Marrëveshje për blerjen e Plotë dhe Totale të Grenlandës” nga SHBA-ja.
Duke shkruar në rrjetet sociale, Trump thotë se vendeve përfshirë Danimarkën, Norvegjinë, Suedinë, Francën, Gjermaninë, Mbretërinë e Bashkuar, Holandën dhe Finlandën do t’u vendoset “një tarifë prej 10%” për “të gjitha dhe çdo” lloj malli të dërguar në SHBA.
Qe çka shkroi mes tjerash Trump në “Truth”:
“Ne kemi subvencionuar Danimarkën, dhe të gjitha vendet e Bashkimit Evropian, si dhe të tjerë, për shumë vite duke mos u tarifuar atyre Tarifa, apo ndonjë formë tjetër shpërblimi. Tani, pas shekujsh, është koha që Danimarka të kthejë mbrapsht — Paqja Botërore është në rrezik! Kina dhe Rusia e duan Grenlandën, dhe nuk ka asgjë që Danimarka mund të bëjë për këtë. Ata aktualisht kanë dy sajë me qen si mbrojtje, njëra prej të cilave u shtua së fundmi. Vetëm Shtetet e Bashkuara të Amerikës, nën PRESIDENTIN DONALD J. TRUMP, mund të luajnë në këtë lojë, dhe atë shumë suksesshëm! Askush nuk do ta prekë këtë pjesë të shenjtë të Tokës, veçanërisht pasi Siguria Kombëtare e Shteteve të Bashkuara, dhe e botës në përgjithësi, është në rrezik.
Përveç të tjerash, Danimarka, Norvegjia, Suedia, Franca, Gjermania, Mbretëria e Bashkuar, Holanda dhe Finlanda kanë udhëtuar drejt Grenlandës, për qëllime të panjohura. Kjo është një situatë shumë e rrezikshme për Sigurinë, Mbrojtjen dhe Mbijetesën e Planetit tonë. Këto vende, të cilat po luajnë këtë lojë shumë të rrezikshme, kanë vënë në lojë një nivel rreziku që nuk është i mbrojtshëm apo i qëndrueshëm. Prandaj, është e domosdoshme që, me qëllim mbrojtjen e Paqes dhe Sigurisë Globale, të merren masa të forta në mënyrë që kjo situatë potencialisht e rrezikshme të përfundojë shpejt dhe pa diskutim.
Duke filluar nga 1 shkurti 2026, të gjitha vendet e sipërpërmendura (Danimarka, Norvegjia, Suedia, Franca, Gjermania, Mbretëria e Bashkuar, Holanda dhe Finlanda), do të ngarkohen me një Tarifë prej 10% për çdo dhe të gjitha mallrat e dërguara në Shtetet e Bashkuara të Amerikës. Më 1 qershor 2026, Tarifa do të rritet në 25%. Kjo Tarifë do të jetë e detyrueshme dhe e pagueshme deri në momentin që të arrihet një Marrëveshje për blerjen e Plotë dhe Totale të Grenlandës.”
Tarifat janë taksa mbi mallrat e importuara dhe zakonisht i paguhen qeverisë nga kompanitë që sjellin produkte të huaja.
Trump kishte kërcënuar më parë se do të vendoste tarifa ndaj vendeve që kundërshtonin planin e tij për të marrë kontrollin e Groenlandës.
Duke folur gjatë një eventi në Shtëpinë e Bardhë dje, Presidenti i ShBA-së deklaroi se “mund të vendos tarifa ndaj vendeve nëse ato nuk pajtohen me çështjen e Groenlandës, sepse na duhet Groenlanda për sigurinë kombëtare.”
