Lëvizje dramatike mes përshkallëzimit të tensioneve; SHBA akuzon regjimin Maduro për trafik droge dhe shkelje të të drejtave të njeriut.
Presidenti i Shteteve të Bashkuara, Donald Trump, ka njoftuar se hapësira ajrore mbi dhe përreth Venezuelës do të mbyllet plotësisht, një deklaratë që vjen në një moment kur marrëdhëniet mes dy vendeve po përshkallëzohen me ritme të shpejta.
Përmes një postimi në platformën e tij Truth Social, Trump iu adresua jo vetëm kompanive ajrore dhe pilotëve, por edhe trafikantëve të drogës e të qenieve njerëzore, duke i paralajmëruar se qielli venezuelian nuk është më i aksesueshëm.
Nga Caracasi nuk ka ende një reagim zyrtar, por masa e re pritet të tensionojë edhe më tej situatën tashmë të brishtë.
Lëvizja e Trump-it vjen pas javësh deklaratash të forta nga zyrtarë të lartë amerikanë, të cilët e akuzojnë regjimin e Nicolas Maduros për bashkëpunim me rrjete të trafikut të drogës dhe korrupsion të thellë.
Administrata amerikane pretendon se mbyllja e hapësirës ajrore është pjesë e një fushate më të gjerë për të frenuar trafikun ndërkombëtar të narkotikëve, por shumë analistë paralajmërojnë se në sfond po ndërtohet një skenar që mund të çojë drejt përpjekjeve për rrëzimin e Maduros nga pushteti.
Në këtë kuadër, SHBA-t[ kan[ dislokuar një aeroplanmbajtëse në Karaibe dhe kan[ kryer bombardime kundër mjeteve detare që i kan[ identifikuar si pjesë të operacioneve të trafikut të drogës, duke shkaktuar dhjetëra viktima – operacione që ekspertë të Kombeve të Bashkuara i kanë cilësuar si ekzekutime jashtëgjyqësore.
Tensionet janë rritur edhe më shumë pasi Trump paralajmëroi gjatë kësaj jave se SHBA-t[ do të nisin së shpejti goditje edhe “tokësore” kundër rrjeteve të trafikut venezuelian, deklaratë që është interpretuar gjerësisht si një shenjë e qartë se operacionet amerikane mund të zgjerojnë fushën e tyre të veprimit.
Në një adresim televiziv, Maduro reagoi me sfidë, duke theksuar se populli venezuelian nuk do të trembet dhe se vendi është i përgatitur të mbrojë sovranitetin e tij.
Ndërkohë që retorika përshkallëzohet, rajoni po hyn në një fazë të re pasigurie. Mbyllja e hapësirës ajrore mund të ndikojë në trafikun civil, transportin humanitar dhe operacionet ndërkombëtare të sigurisë, ndërsa rreziku i një përplasjeje të drejtpërdrejtë mes SHBA-ve dhe Venezuelës sa vjen e rritet.
Situata duket e destinuar të mbetet e tensionuar, ndërsa komuniteti ndërkombëtar pret zhvillimet e radhës të një krize që po thellohet nga dita në ditë.
