Tre persona janë vrarë dhe disa të tjerë janë plagosur nga të shtënat me armë zjarri të dielën në mesditë në Gjilan, kanë konfirmuar Policia e Kosovës dhe Spitali i Përgjithshëm i qytetit.
Sipas Policisë, fillimisht është konstatuar vdekja e dy personave në vendin e ngjarjes, në rrugën “Ibrahim Rugova”, ndërsa dy të plagosur janë dërguar në Qendrën Emergjente të Gjilanit. Më vonë, nga Spitali është bërë e ditur se një person ka ndërruar jetë në vendngjarje, ndërsa dy të tjerë janë sjellë në Emergjencë pa shenja jete. Një i plagosur është transferuar për në QKUK dhe një tjetër është pranuar në repartin e Ortopedisë. Autoritetet nuk kanë dhënë detaje për gjendjen shëndetësore të të plagosurve.
I dyshuar për vrasjet është Mefail Shkodra, i cili është shpallur në kërkim nga Policia e Kosovës. Autoritetet kanë kërkuar ndihmën e qytetarëve për lokalizimin e tij dhe kanë publikuar një fotografi të të dyshuarit. Në njoftimin zyrtar thuhet se kushdo që ka informacion për vendndodhjen e tij duhet të lajmërojë Policinë në stacionin më të afërt, përmes aplikacionit “Lajmëro Policinë”, në adresën elektronike [email protected], ose në numrat 192 dhe 03850807001.
Në vendin e ngjarjes kanë intervenuar njësitet relevante policore dhe prokurori i shtetit.
