Ish-pjesëtari i Policisë së Kosovës, Nexhat Pireva, është ndaluar të dielën në mëngjes në pikën kufitare Dheu i Bardhë, ndërsa po udhëtonte me familjen drejt Bujanocit. Ministria e Punëve të Jashtme ka njoftuar se ai është marrë në pyetje për rreth katër orë dhe më pas është liruar. Rasti i Pirevës është pjesë e një serie ndalesash nga autoritetet serbe, të cilat që nga qershori kanë arrestuar së paku tetë shtetas të Kosovës.
Autoritetet serbe e kanë arrestuar e më pas e kanë liruar ish-pjesëtarin e Policisë së Kosovës nga Kamenica, Nexhat Pireva.
Ministria e Punëve të Jashtme dhe Diasporës ka njoftuar në një postim në Facebook se Pireva është arrestuar të dielën në orët e para të mëngjesit, në pikën kufitare Dheu i Bardhë.
Pireva, i cili ka mbajtur uniformën e Policisë për rreth 14 vjet, po udhëtonte drejt Bujanocit me bashkëshorten dhe fëmijët e tyre.
“Pas marrjes në pyetje për rreth katër orë, z. Pireva është liruar dhe aktualisht ndodhet në liri. Ministria e Punëve të Jashtme dhe Diasporës dënon veprimet e vazhdueshme të autoriteteve serbe, të cilat përbëjnë keqtrajtim të shtetasve të Republikës së Kosovës dhe janë në kundërshtim me marrëveshjet e nënshkruara mes dy shteteve”, thuhet në njoftimin e MPJD-së për Kohën.
Të martën në Serbi është arrestuar edhe Avni Qenaj, ish-pjesëtar i Ushtrisë Çlirimtare të Kosovës, me pretekstin autoriteteve në Beograd se “ka qenë pjesë e një organizate terroriste”
Sipas Ministrisë së Punëve të Brendshme të Serbisë, Qenaj në prill të vitit 1998 i është bashkuar shtabit lokal të UÇK-së për fshatin Romajë në Komunën e Prizrenit dhe se si pjesëtar i brigadës 138 “Agim Ramadani” ka marrë pjesë në betejën e Koshares në vitin 1999.
Qenajt i është caktuar masa e paraburgimit prej 30-ditësh.
10 ditë më parë autoritetet serbe e liruan nga paraburgimi pas afro 5 muajsh ish-policin Arbnor Spahiu, i cili ishte ndaluar nën dyshimet për “vrasje të rëndë”, lidhur me ngjarjet në Banjskë në vitin 2023.
Pas mbërritjes në Kosovë, Spahiu është pritur nga presidentja Vjosa Osmani, e cila u ka bërë thirrje qytetarëve të Kosovës që jetojnë jashtë vendit, sidomos atyre që planifikojnë të udhëtojnë për festat e fundvitit, që të shmangin kalimin nëpër territorin e Serbisë.
Në shtator të këtij vitit është arrestuar edhe 77-vjeçari Hazir Haziri nga Podujeva, nën dyshimet për krime lufte.
E derisa po kthehej nga Gjermania, në gusht është arrestuar Behar Preniqi, nën dyshimet për krime lufte. Në atë kohë ishin arrestuar dhe më pas liruar edhe vëllezërit Bashkim dhe Xhemajl Emini.
E në korrik është arrestuar Lulzim Halili nga Peja, edhe ai nën dyshimet për krime lufte, si pjesëtar i UÇK-së.
