Në SHBA sot do të mbahen një numër i madh zgjedhjesh në nivele të ndryshme, ndërsa fokusi kryesor do të jetë tek zgjedhjet për kryetar bashkie në New York, si dhe zgjedhjet për guvernatorë në shtetet federale New Jersey dhe Virginia.
Në New York, votuesit do të zgjedhin një kryetar të ri bashkie, pasi kryetari aktual, Eric Adams, është tërhequr nga gara për rizgjedhje.
Favorit është kandidati demokrat Zohran Mamdani, ndërsa kundërshtarët e tij janë Andrew Cuomo, ish-guvernatori i shtetit të New Yorkut, i cili ka nisur një fushatë të pavarur, dhe kandidati republikan Curtis Sliwa.
Përveç zgjedhjeve në New York, në qendër të vëmendjes janë edhe ato për guvernatorë në Virginia dhe New Jersey.
Në New Jersey, Partia Demokratike ka frikë se mund të humbasë “bastionin” e saj, duke pasur parasysh se vetëm një nga gjashtë guvernatorët e fundit ka qenë republikan, si dhe faktin që Kamala Harris e mundi Donald Trumpin në këtë shtet në zgjedhjet presidenciale të vitit 2024.
Guvernatori aktual, Phil Murphy nuk kishte të drejtë të kandidojë sërish, dhe votuesit e New Jerseyt do të zgjedhin midis kandidates demokrate Mikie Sherrill dhe kundërshtarit të saj republikan Jack Ciattarelli.
Sondazhet tregojnë se Sherrill ende ka epërsi, por diferenca është befasuese e vogël, dhe pritet një garë “deri në votën e fundit”.
Në Virginia, betejën zgjedhore do ta zhvillojnë Winsome Earle-Sears nga Partia Republikane dhe Abigail Spanberger nga Partia Demokratike, pasi guvernatori aktual shumë popullor, Glen Youngkin, nuk kishte të drejtë të kandidojë sërish.
Edhe pse Harris e mundi Trumpin vitin e kaluar në këtë shtet, Virginia nuk konsiderohet si një “shtet i sigurt” për demokratët. Në fakt, Spanberger ka epërsi sipas të gjitha sondazheve, por situata e disa viteve më parë, kur fitoi Youngkin, tregon se sondazhet nuk janë gjithmonë tregues të saktë.
Ajo që është e rëndësishme për t’u theksuar, sipas analistëve politikë amerikanë, është se këto zgjedhje do të jenë testi i parë elektoral për agjendën e Donald Trumpit.
Ciattarelli dhe Earle-Sears kanë marrë mbështetjen e plotë të ish-presidentit amerikan dhe i përkasin grupit të tij “MAGA” (Make America Great Again), ku bëjnë pjesë disa prej populistëve më radikalë republikanë.
Sigurisht, duke qenë se Virginia dhe New Jersey janë shtete “blu” (që zakonisht votojnë për demokratët), është e vështirë t’i atribuohen vetëm Trumpit humbjet e mundshme të republikanëve, por politika e tij po përballet sot me testin e parë real në këto zgjedhje.
Në fund, duhet theksuar se do të mbahen edhe shumë zgjedhje të tjera për kryetarë bashkish, si dhe një zgjedhje për një vend në Dhomën e Përfaqësuesve të Kongresit Amerikan në Teksas, që konsiderohet një fitore e sigurt për demokratët.
