Telekomi i Kosovës do të nënshkruaj nesër një kontratë me negocim të drejtpërdrejtë me kompaninë kroate Verso Altima D.O.O. – Branch in Kosovo, për implementimin e sistemit të Portabilitetit të Numrave (Number Portability – NP), shkruan Demokracia.com.
Vlera e saj arrin në 190,140.48 euro, ndërsa afati i zbatimit është 240 ditë pune (afërsisht 8 muaj), me fillim të menjëhershëm pas nënshkrimit.
Kjo kontratë, edhe pse e rëndësishme për funksionalitetin e Telekomit, ngre dyshime mbi transparencën dhe konkurrencën, pasi është dhënë përmes negociatave të drejtpërdrejta në vend të një tenderi të hapur, që do të mundësonte një garë më të drejtë dhe oferta potencialisht më të favorshme për Telekomin dhe qytetarët.
Sistemi i Portabilitetit të Numrave ka rëndësi për tregun e telekomunikacionit, pasi i lejon përdoruesit të ndryshojnë operatorin pa humbur numrin e tyre. Megjithatë, procesi i prokurimit për këtë projekt lë shumë pikëpyetje:
- Pse u zgjodh një kontratë me negocim dhe jo një tender i hapur?
- A ka pasur ndonjë analizë tregu që vërteton se kjo kompani është opsioni më i mirë për këtë projekt?
- Pse është krijuar varësi nga projekte të tjera në vazhdim, duke e bërë afatin e përfundimit të pasigurt?
- Si është garantuar që çmimi i kontratës është më i favorshmi për Telekomin dhe përdoruesit e tij?
Kjo nuk është hera e parë që Telekomi i Kosovës bën kontrata të diskutueshme me negocim të drejtpërdrejtë, një praktikë që shpesh shoqërohet me mungesë transparence dhe dyshime mbi menaxhimin financiar të ndërmarrjes. Duke qenë një kompani publike në vështirësi financiare, Telekomi duhet të veprojë me më shumë llogaridhënie dhe transparencë, veçanërisht në kontrata që ndikojnë drejtpërdrejt në cilësinë e shërbimeve për qytetarët.
përgjigje për këto pyetje, për të siguruar që paratë publike po përdoren në mënyrë të drejtë dhe efektive.
Pse nevojitet kjo kontratë?
Kjo kontratë synon të implementojë sistemin e Portabilitetit të Numrave (Number Portability – NP) në Telekomin e Kosovës. Ky sistem është thelbësor për tregun e telekomunikacionit, pasi lejon përdoruesit të ndryshojnë operatorin pa humbur numrin e tyre.
Në kuadër të këtij projekti, Telekomi do të:
- Instalojë dhe konfigurojë platformën NP, duke e integruar me sistemet ekzistuese të CRM, POS, billing dhe rrjetin bazë.
- Sigurojë funksionalitetin e transferimit të numrave, në përputhje me rregulloret e ARKEP.
- Testojë dhe përshtatë sistemin sipas nevojave të Telekomit.
Megjithëse është një projekt i rëndësishëm, mënyra e prokurimit të kësaj kontrate ngre dyshime mbi transparencën dhe menaxhimin financiar të Telekomit. /Demokracia.com/
