Fabio Capello ngre zërin. Ish-trajneri i Real Madridit, Milanit dhe Juventusit, ndër të tjera, ka shprehur indinjatën e tij në “El Programa de Ortega” kundër refuzimeve të fundit të kombëtares axurre nga disa lojtarë si Francesco Acerbi, i cili nuk pranoi të shkonte në grumbullimin e fundit për shkak të problemeve me trajnerin: “Është turp që një lojtar të heqë dorë nga të luajturit për vendin e tij”.
Capello foli edhe për gjendjen aktuale të kombëtares italiane, që rrezikon të mbetet jashtë Botërorit për herë të tretë radhazi: “Më zemëron shumë kjo situatë. Kjo skuadër nuk ka shpirt, duhet parë nëse Gattuso do të mund t’ia japë”.
Trajneri veteran italian përfitoi nga intervista për të lavdëruar Carlo Ancelottin, të cilin e kishte stërvitur gjatë kohës së tij si trajner në “San Siro”: “Është trajneri më i mirë në botë, ka një aftësi unike për të menaxhuar grupet dhe për të fituar pa bërë zhurmë”.
Në lidhje me aventurën e re të Ancelottit në krye të kombëtares braziliane, Capello bëri një dallim mes drejtimit të klubeve dhe kombëtareve: “Të stërvitësh një kombëtare është punë shumë e vështirë, por nëse arrin sukses edhe aty…”.
Për pasuesin e italianit në stolin e Real Madridit, Xabi Alonso, Capello gjithashtu pati fjalë pozitive: “Ajo që ka bërë është e jashtëzakonshme, mori një ekip që nuk kishte fituar kurrë asgjë dhe e bëri dominues në Gjermani”.
Sa i përket debatit mbi atë se kush e meriton çmimin si lojtari më i mirë i vitit, Capello ishte i qartë: “Vetëm për moshën që ka dhe gjithë ato që ka bërë këtë sezon, për mua e meriton Lamine Yamal”.
Në fund, si një legjendë e stolit të Milanit, Capello komentoi edhe mundësinë e transferimit të Luka Modric në “San Siro”: “Besoj se mund të përshtatet mirë, ritmi i futbollit italian aktualisht nuk është shumë i lartë dhe aty ai mund të bëjë ende diferencën”.
The post Capello kritikon ashpër lojtarët italianë: Është turp të refuzosh kombëtaren e vendit tënd appeared first on GazetaBlic.
