Një ngjarje e rëndë ka ndodhur paraditen e sotme në rrugën Prishtinë–Prizren, ku një biznes është bërë cak i një sulmi të dyshuar kriminal.
Persona ende të panjohur kanë sulmuar një mobileri, fillimisht duke thyer xhamin frontal të lokalit, e më pas kanë hedhur mjet ndezës brenda objektit, duke shkaktuar zjarr dhe dëme të konsiderueshme materiale.
Siç raporton Sinjali, pranë lokalit është gjetur edhe një çekan, i cili dyshohet se është përdorur gjatë kryerjes së sulmit.
Menjëherë pas marrjes së informacionit, në vendin e ngjarjes kanë dalë njësitë policore, hetuesit rajonalë dhe forenzika, të cilët kanë kryer ekzaminimet e para dhe kanë nisur mbledhjen e provave që mund të çojnë në identifikimin e autorëve.
Deri në këtë fazë nuk raportohet për persona të lënduar, ndërsa dëmet materiale brenda lokalit konsiderohen të mëdha.
Rasti është iniciuar si “Zjarrvënie”, teksa hetimet për zbardhjen e motivit dhe kapjen e të dyshuarve janë në zhvillim.
