Ministrja e Arsimit, Shkencës, Teknologjisë dhe Inovacionit, Arbërie Nagavci, është demantuar keq nga komunat.
Derisa e para e Arsimit ka deklaruar se ministria nuk ka asnjë kërkesë nga komunat për ndërtim të çerdheve, Asociacioni i Komunave të Kosova ka treguar se në këtë mandat qeverisës komuna kanë dorëzuar dhjetëra kërkesa për ndërtim të çerdheve.
Drejtori ekzekutiv i Asociacionit të Komunave të Kosovës, Sazan Ibrahimi, ka thënë ministrja Nagavci nuk po e thotë të vërtetën.
Në një prononcim për gazetën Nacionale, ai ka thënë se komunat vazhdimisht kanë bërë kërkesa për ndërtim të çerdheve të reja.
“Faktet janë fakte dhe janë të pamohueshme- komunat bëjnë kërkesa të pareshtura në mashti për çerdhe të reja. Ministre Nagavci, po, komunat e Republikës së Kosovës kanë nevojë për çerdhe publike dhe kanë bërë kërkesa të pareshtura në Ministrinë e Arsimit, Shkencës, Teknologjisë dhe Inovacionit (MASHTI). Kryetarët e Komunave vlerësojnë që shërbimet që ofrohen nga çerdhet janë shumë të rëndësishme për zhvillimin e e fëmijëve”, ka thënë ai,
Ibrahimi ka përmendur kërkesat konkrete të komunave për çerdhe.
Sipas tij, ministra nuk është marrë fare me kërkesat e komunave.
“Përshembull, Komuna e Kaçanikut ka bërë kërkesë në MASHTI duke ia prezantuar edhe lejen për ndërtim, vendimin e Kuvendit komunal dhe dokumentet tjera përcjellëse mirepo, kjo kërkesë nuk ka marë asnjë përgjigje. Për komunën e Vitisë; ka qenë e vendosur të ndërtohet një çerdhe mirëpo MASHTI në procedura të tenderimit, e të cilat procedura i ka udhëhequr vetë, ka vendosur ta anuloj vendimin e vet dhe që këtë projekt ta bartë në një komunë tjetër. Gjithashtu, komuna e Vitisë ka bërë edhe në një kërkesë tjetër të miratuar nga komuna, mirëpo nuk ka marë pergjigje nga MASHTI. Komuna e Prizrenit ka bërë dhe është duke bërë kërkesa në MASHTI, mirëpo këto kërkesa refuzohen apo nuk miratohen. Komuna e Istogut që disa vite pret përfundimin e një çerdhe e cila ka filluar të ndërtohet nga MASHTI”, është shprehur ai, duke përmendur edhe kërkesat e komunave tjera.
“Komuna e Istogut është e gatshme ta përfundojë këtë objekt mirëpo nuk I lejohet nga MASHTI vazhdimi I punimeve. Komuna e Pejës ka kërkuar vetëm 100 shtretër shtesë për një çerdhe publike por nuk ka marë ndonjë përgjigje nga MASHTI. Komuna e Ferizajit, ka bërë kërkesë gjithashtu mirëpo MASHTI ka thënë që mund të përkrah projekte për ndërtimin e çerdheve vetëm në zonat urbane por jo edhe ato rurale. Ministre Nagavci, qytetarët jetojnë edhe në vende rurale e jo vetëm urbane. Komuna e Deçanit, i ka dërguar dy kërkesa MASHTI për adaptimin e dy shkollave të vjetra në çerdhe dhe dy kërkesa të tjera për ndërtimin e dy çerdheve të reja, por nuk kanë marë përgjigje. Komuna e Drenasit i ka 2 çerdhe në renovim/përshtatje të anekseve të shkollave dhe I ka ndarë dy lokacione për ndërtimin e çerdheve të reja e të cilat janë në procedurë. Në komunën e Suharekës, e vetmja çerdhe e cila ka filluar të financohet nga MASHTI, qe për disa vite nuk është ndërmarrë asnjë veprim dhe kjo ka mbetur e papërfunduar. Këto janë fakte dhe si konkluzion, komunat gjithnjë kanë bërë kërkesa për ndërtimin e çerdheve të reja. Komunat edhe me vet-financim, si komuna e Lipjanit, Rahovecit, Mitrovicës, Suharekës etj duke e parë nevojën për çerdhe dhe kërkesën e pareshtur të qytetarëve, kanë ndërtuar çerdhe publike. Pra, shihet se komunat janë më efikase në ndërtimin e çerdheve të reja në raport me MASHTI. Këto janë vetëm disa info nga disa komuna se po t’i shënonim të gjitha komunat, atëherë nuk dihet se sa kërkesa janë drejtuar te ju. Ministre Nagavci, të gjitha këto të cilat janë të përmendura më lartë janë edhe të dokumentura”, është shprehur Ibrahimi.
Ai ka kritikuar qasjen e MASHTI-it ndaj komuna. Sipas tij, qasje e ministrisë është e gabueshme.
“Qasja e MASHTI ndaj Komunave në kërkesat e tyre nuk është korekte dhe është tepër demotivuese dhe dekurajuese sepse kërkesat e komunave nuk po përkrahen. Kjo qasje po I demotivon komunat për të bërë kërkesa të reja. Ka komuna ku ndërtesat për çerdhe janë ndërtuar me mjete vetanake komunale, mirëpo nuk mund të fuknsionalizohen sepse MASHTI duhet të lejoj vende të reja pune për profesionistë të kësaj fushe. Kërkesë, e cila është qe disa vite; është mirë që MASHTI të bashkëpunojë dhe t’I inkurajoj komunat në zgjidhjen e problemeve, e të cilat probleme janë të shumta në fushën e arsimit, e jo vetëm të fajsohen”, ka vlerësuar Ibrahimi.
Ndaj të pares së arsimit në vend ka reaguar edhe deputetja e AAK-së, Albana Bytyqi.
Bytyqi, e cila vije nga Suhareka, ka bërë me dije se vetëm kjo komunë që dy vite pret për një çerdhe.
Në profilin e saj në “Facebook”, ajo ka shkruar se ministrja Nagavci ka mashtruar.
“Patën mashtruar se do t’i ndërtonin 160 çerdhe, por kjo Qeveri mashtruese nuk ka arritur të ndërtojë as minimumin e tyre. Këtë dështim të vetin dhe të kësaj qeverie populiste, ministrja Nagavci po mundohet sërish t’ua faturojë komunave, se kinse ato nuk paskan pasur kërkesa për ndërtim të çerdheve. Ministre, veç Komuna e Suharekës që dy vjet pret për çerdhe për shkak të mungesës së inventarit. Meqë kryeministri nuk po dinte as matematikë, me gjasë 160 çerdhe i keni shumëzu me 0.”, ka shkruar Bytyqi.
Ministre e Arsimit, Shkencës, Teknologjisë dhe Inovacionit, Arbërie Nagavci, ka bërë me dije se Qeveria ka buxhet të mjaftueshëm për ndërtimin e çerdheve.
Por, sipas saj, tani komuna nuk kanë bërë asnjë kërkese për ndërtim të çerdheve.
“Si Qeveri ne kemi ndarë buxhetin e nevojshëm dhe të mjaftueshëm për ndërtimin e çerdheve dhe kopshteve, nëse ne synojmë të ndërtojmë një çerdhe ose kopsht në një komunë, kërkesa duhet të vijë nga komuna dhe tani që po flasim ne nuk kemi asnjë kërkesë të asnjë komune për çerdhe”, është shprehur Nagavci.
Kryeministri Albin Kurti ishte zotuar se në mandatin e tij qeverisës do t’i ndërtonte 160 çerdhe.
