Kryeministri në detyrë, Albin Kurti ka shmangur festën për përvjetorin e Pavarësisë së Shqipërisë më 28 nëntor, për të marrë pjesë në një tubim të socialistëve në Maltë.
Ai nuk ka marrë pjesë as në ceremoninë kryesore të mbajtur të premten në Vlorë. Atje si përfaqësues kishte dërguar Donika Gërvallën, Albulena Haxhiun e Xhelal Sveçlën e zyrtarë të tjerë në detyrë.
Ndërkaq, ai nuk ishte as për homazhe te varrezat e Jasharajve për ditëlindjen e komandantit legjendar, Adem Jashari.
Në Prekaz kishte dërguar ish-kryetarin e Kuvendit, Dimal Bashën dhe Besnik Bislimin.
Mungesën e tij e ka konfirmuar vetë Vetëvendosja me një postim në Facebok.
“Kryeministri i Republikës së Kosovës, Albin Kurti, mori pjesë në Këshillin e Internacionales Socialiste, që u mbajt në Maltë”, thuhej në një postim të VV-së.
“Përveçse në Presidium, Kryeministri Kurti mbajti edhe një fjalim në vijim të punimeve të Këshillit para delegacioneve pjesëmarrëse, ku ai theksoi rëndësinë e të drejtave të njeriut dhe të sundimit të ligjit. Kryeministri i Kosovës shpjegoi se si në mandatin e tij lufta kundër korrupsionit ka kontribuar në rritjen ekonomike gjersa politikat sociale të rishpërndarjes e kanë bërë zhvillimin progres gjithëpërfshirës”, thuhej më tej.
“Në punimet e këtij Këshilli morën pjesë edhe krerë të lartë të Qeverive nga vende të ndryshme, përfshirë Kryeministrin e Maltës Robert Abela si nikoqir si dhe Kryeministrin e Spanjës dhe Kryetarin e IS, Pedro Sánchez, të cilët së bashku me liderë të tjerë progresistë diskutuan mbi dinamikat aktuale globale e sidomos ato në Mesdhe, si dhe rolin e detyrat e Internacionales Socialiste në këtë kontekst”, thuhej më tej.
Kurti uroi për 28 nëntorin më 27 nëntor me një postim në Facebook.
