Nëse telefonata me të vërtetë është zhvilluar në WhatsApp dhe mund të jetë përgjuar, situata ngre tre skenarë të mundshëm.
Skandali “Witkoff-gate” po bëhet edhe më i ndërlikuar, pasi këshilltari i presidentit rus Vladimir Putin, Yuri Ushakov, ka deklaruar se rrjedhja e bisedës së përfolur me të dërguarin amerikan Witkoff mund të ketë ndodhur për shkak të përdorimit të WhatsApp-it.
Ushakov pranoi se ndonjëherë zhvillon komunikime pune përmes aplikacionit, duke shtuar se bisedat e tilla “mund të jenë dëgjuar”. Ai theksoi se linjat e komunikimit të sigurt të Kremlinit pothuajse kurrë nuk pësojnë rrjedhje, por në rastin e WhatsApp-it situata është krejt tjetër, duke aluduar se rrjedhja nuk ka të ngjarë të ketë ardhur nga vetë pjesëmarrësit e bisedës.
Ironia qëndron në faktin se një zyrtar i Kremlinit komunikonte përmes një aplikacioni të ndaluar zyrtarisht në Rusi, ndërsa përdorimi i platformave të Meta-s prej zyrtarëve rusë konsiderohet i papranueshëm sipas linjës zyrtare të Moskës.
Nëse telefonata me të vërtetë është zhvilluar në WhatsApp dhe mund të jetë përgjuar, situata ngre tre skenarë të mundshëm:
- Aplikacioni ka një backdoor – diçka që Meta e mohon kategorikisht.
- Pajisja e Ushakovit mund të jetë e infektuar me spyware.
- Ai ka përdorur një lidhje të pasigurt dhe tani po shmang përgjegjësinë duke fajësuar platformën.
Skandali po ngre pikëpyetje të mëdha mbi standardet e sigurisë së komunikimit brenda Kremlinit, por edhe mbi natyrën e bisedave mes Moskës dhe emisareve të administratës Trump.
