Janë bërë pesë ditë që pajisja diagnostikuese – CT, e cila përdoret për rastet urgjente në Klinikën e Emergjencës në QKUK, ka dalë jashtë funksionit për shkak të një defekti.
Këtë e kanë bërë të ditur disa burime për gazetaren e Klan Kosovës, Arbreshë Uka.
Pacientët që shkojnë në Qendrën Emergjente në QKUK tani duhet të dalin jashtë këtij objekti për të kryer CT-në në Klinikën e Neurologjisë. Përveç kësaj, burimet bëjnë me dije se që prej pesë ditësh nuk ka as kontrast – material ky shpenzues dhe i domosdoshëm për realizimin e CT-së me kontrast.
Televizioni ka raportuar disa herë për mungesa të tilla, ku pacientët shpeshherë detyrohen ta blejnë vetë kontrastin.
Në anën tjetër, QKUK ka 4 aparatura të CT-së, njëra e vendosur në klinikën e Emergjencës, tjetra në Neurologji, kurse ajo në Onkologji është shumë e vjetër, dhe e fundit ndodhet në Klinikën e Pediatrisë.
Pos këtyre, gazetarja Arbreshë Uka mëson se edhe CT-ja në Spitalin e Përgjithshëm të Pejës është jashtë funksionit prej një muaj, pajisje kjo që është e vjetër.
Rastet e këtij spitali po dërgohen në Spitalin e Përgjithshëm të Gjakovës.
Defektet me aparaturat diagnostike nuk janë të rralla në Spitalin e Pejës. Muaj më parë Klan Kosova raportoi për Rezonancën Magnetike, pajisje kjo e shtrenjtë dhe e blerë rishtas që kishte pësuar prishje, duke u rikthyer më vonë në funksion./Klankosova.tv
